FOTO: Të flasësh për varfërinë me fustane që vishen për “Oscar”

KU ESHTE ARTA MARKU???

Nëse ka një ish funksionar të lartë të shtetit që ka akuzat zyrtare më të rënda në kurriz ky është ish Prokurori i Përgjithshëm i Shqipërisë, Adriatik Llalla.

Nëse ka një njeri që është sulmuar me emër me zë dhe figurë që nga ambasadori amerikan në Tiranë Donald Lu e deri tek Sekretari Amerikan i Shtetit, duke e shpallur madje person “non grata” familjarisht, ky është sërish Adriatik Llalla.

Megjithatë, pasi qëndroi disa kohë në Gjermani dhe sistemoi familjen e tij me shpenzime të mëdha, është rikthyer në Tiranë duke i bërë një sfidë të hapur drejtësisë shqiptare, dhe më konkretisht vetë Prokurores së Përgjithshme të përkohëshme, Arta Marku.

Llalla hetohet nga Krimet e Rënda për disa vepra penale, që nga ajo e refuzimit për deklarim, mosdeklarimit, fshehjes ose deklarimit të rremë të pasurise, interesave private të zgjedhur dhe nëpunësve publikë ose i çdo personi tjetër që ka detyrimin ligjor për për deklarim; mosdeklarimit të shumave të të hollave në kufi, pastrimit të produkteve të veprës penale(pastrim parash) dhe shpërdorimit të detyrës.

Dhe me gjithë këto akuza të rënda në kurriz, që në një vend normal duhej të kishte “bujtur” me kohë në një burg të sigurisë së lartë me një dënim goxha të gjatë, ai shetit i lirë nëpër Tiranë, takon miqtë, bën “qoka”, merret me shtëpitë dhe punon për të zhbllokuar pronat e sekuestruara.

Në fillim Prokuroria mos-thirrjen e Llallës për të dëshmuar dhe marrjen nën hetim penal e justifikoi me faktin se nuk ndodhej në Shqipëri dhe pavarësisht prokurës në gjuhën turke dhe me vulën apostile të shtetit turk, organi i akuzës kërkonte vetë ish Kryeprokurorin për ta pyetur.

Ndërkohë Llalla u rikthye në Shqipëri, ishte “Pamfleti” ai që botoi lajmin se ish Prokurori i Përgjithshëm ishte parë në një nga lokalet e kryeqytetit bashkë me ish krahun e djathtë të tij Rovena Gashin dhe ish ministrin e Drejtësisë Enkelejd Alibeajn, sërish Arta Marku heshti.

Tashmë që Adriatik Llalla ka vendosur të qëndrojë gjatë në Shqipëri, dhe mediat japin çdo ditë pothuajse të gjitha lëvizjet e takimet e tij nëpër Tiranë, vetëm Prokuroria shqiptare nuk kujtohet për ta thirrur dhe marrë nën hetim.

Pasi dhe justifikimi për provat dhe faktet që po mbledh organi shqiptar i akuzës bie, sepse organet ligjzbatuese gjermane kanë sjellë çfarë ka kërkuar Prokuroria shqiptare, madje dhe më tepër se sa kanë kërkuar, dhe dosja e Adriatik Llallës tashmë është e kopsitur.

Mungon vetëm dëshmia e ish Kryeprokurorit për akuzat e shumta, e cila duhet të materializohet dhe të futet në dosje, që ai të shkojë në gjykatë dhe ajo të vendosë nëse do të gjykohet në gjendje të lirë apo në gjendje arresti.

Por prokuroria shqiptare, ndonëse e ka dosjen gati dhe Llallën që i bie kryq e tërthor Tiranës me miqtë e tij këtu, s’ka denjuar ta thërrasë për ta pyetur e marrë dëshminë e tij për akuzat e rënda, të artikuluara jo vetëm nga organi shqiptar i akuzës por dhe nga Sekretari Amerikan i Shtetit.

Duke qënë se Llalla ka disa muaj që po vërtitet nëpër Tiranë dhe Shqipëri, ndërsa Prokuroria pasi e kërkoi për hetim kur ishte jashtë vendit tani hesht, gjasat janë se ish kryeprokurori i akuzuar për të gjithë veprat penale të mundshme, po mbrohet nga kupola politike.

Berisha dhe Meta dihet botërisht që e kanë mbrojtur dhe e mbrojnë, pasi u ka mbuluar të gjitha maskarallëqet dhe i ka shpëtuar nga burgu, por atyre u është shtuar dhe kryeministri Rama.

Nuk është rastësi që Rama e kishte menduar emërimin e Llallës ambasador në një nga vendet kryesore të BE, lajmi është bërë publik dhe s’është përgënjeshtruar asnjëherë nga kryeministri, megjithëse SHBA e kishte shpallur person të padëshirrueshëm, duke i ndaluar hyrjen në vend.

Kjo do të thotë se dhe Rama e ka marrë nën mbrojtje Llallën, duke përcjellë mesazhin tek Arta Marku se ai s’duhet të preket nga drejtësia dhe akuzat ndaj ish Kryeprokurorit për kryeministrin janë zeruar.

Mister mbetet fakti se përse Berisha, Meta dhe Rama e mbrojnë fort Adriatik Llallën sa ushtrojnë presion ndaj Arta Markut jo vetëm që të mos e akuzojë prokuroria për krimet e rënda që ka mbi kurriz, por që as të mos e “shqetësojnë” për ta thirrur që të dëshmojë.

Çfarë ka në dorë Adriatik Llalla për “kupolën” politike shqiptare, që ajo e mbron me kaq forcë dhe nuk e “dorëzon” në duart e drejtësisë?!

Pasi nuk besojmë se e mëshirojnë për sëmundjen e “epilepsisë”, sepse kësaj “sëmundjeje” Llalla “i mbijetoi” kur SHBA e shpalli të padëshiruar familjarisht, bashkë dhe me Rovena Gashin