Gjuha agresive e përdorur në seancën e djeshme ka sjellë dhe reagimin e LSI-së. Gjatë një deklarate për mediat, sekretari i Përgjithshëm i LSI, Luan Rama ka kërkuar nga politika të lërë tej gjuhën e vjetër, të shpifjes e zhargonit që s’ka asgjë të përbashkët me standardet e sjelljes evropiane.
“Shprehim indinjatë për zhargonin vulgar dje gjatë seancës në Kuvend dje, që dëshmon sërish që standardi i reflektimit në përgjegjshmëri dhe në përputhje me frymën që kërkon integrimi lë për të dëshiruar. Distancohemi nga sjellje të tilla që s’kanë asgjë të përbashkët me etikën parlamentare, qytetare dhe frymën evropiane të partneritetit mes faktorësh e aktorësh politikë në Kuvend. Jemi në një moment historik, jo vetëm se jemi në vigjilje të 100 vjetorit, por edhe prej detyrimit që lidhet me angazhimet prioritare që ka marrë vendi në kuadër të procesit të anëtarësimit në BE. Politika shqiptare duhet të lërë mënjanë gjuhën, mentalitetin e vjetër dhe të shfaqet në përgjegjshmëri të plotë me mesazhet e BE, SHBA dhe nga gjithë komuniteti ndërkombëtar që pret nga klasa politike qëndrime dhe veprime dinjitoze në përputhje me interesat evropiane të vendit”- tha ai.
Sipas Ramës, është bukur që Kuvendi duartroket Klinton kur flet në sallë, por vetëm ajo nuk mjafton.
“Duhet të reflektojmë me përgjegjshmëri në frymën e mesazheve të rëndësishme që kemi marrë dhe është padyshim jashtë etikës, traditës, trendit evropian që sapo Klinton ikën të rikthehemi te fyerjet zhargoni dhe mungesa e etikës më elementare parlamentare.”- tha ai.