“Me heqjen e tatimit për pagat deri 30 mijë lekë praktikisht sistemi ynë është kthyer në sistem progresiv. Pikërisht atë sistem që z. Berisha deklaron se nuk do ta zbatojë, sapo e ka vënë në jetë”, tha në një deklaratë për shtyp Ervin Mete, kryetar i Grupit G99.
“Kjo është arsyeja pse ne me kaq forcë e prej kaq kohësh po theksojmë nevojën e një sistemi tatimor progresiv. Kur themi se do të vendosim një sistem progresiv, nuk kemi parasysh vetëm tatimin mbi të ardhurat, por të gjitha lëvizjet në komponentët e sistemit tatimor që do të lehtësojnë tatimin mbi shtresën e varfër dhe do të realizojnë një rishpërndarje të shëndetshme të të ardhurave duke afruar shtresat. Tatimi më i lartë që paguan sot qytetari i varfër shqiptar nuk është ai mbi të ardhurat por është tatimi mbi vlerën e shtuar, i cili është në fakt një tatim mbi konsumin. Është e domosdoshme që të hiqet TVSH për shpenzimet më jetike të familjeve të varfra, në mënyrë që realisht të nxitet konsumi dhe realisht të mund të lehtësohen shpenzimet e tyre. Është gjithashtu e domosdoshme, që në tërësinë masave të mund të rishikohen shërbimet sociale dhe ndihmat e drejtpërdrejta që ju jepen këtyre familjeve, të cilat sot keqmenaxhohen e shpërdorohen, por që mund të kthehen lehtësisht në një mjet shumë efektiv për të adresuar vështirësitë e shtresës së varfër.
Lëvizja e bërë nga qeveria, edhe pse deklarohet se bëhet për të rritur konsumin, përveç se tregon mungesë alternativash dhe idesh origjinale, si dhe pranon de fakto politikat fiskale të gabuara të qeverisë, është në fakt shprehje e qartë e nevojës për të lehtësuar barrën e palogjikshme dhe shumë të rëndë tatimore mbi shtresat e varfra të popullsisë. Edhe pse lëvizje elektorale, është lëvizje në drejtimin e duhur përderisa hedh bazat për progresivitetin e sistemit tatimor në Shqipëri”, përfundoi Mete.