GAFA / Gazetari sportiv i TCH i quan lojtarët e Kombëtares “shqipfolës”

Ka qenë ndoshta një gafë nga padija mbi kuptimin e termave, por drejtuesi i emisionit “Procesi Sportiv” në Top Channel, ka prekur jo pak ndjekës të tij kur i ka quajtur lojtarët e kombëtares së futbollit “shqipfolës nga trevat shqipfolëse”.

Gafa ka ndodhur ditën e hënë, në 12 tetor, në emisionin “Procesi Sportiv”, në Top Channel ku  qenë të ftuar lojtarët e përfaqësueses shqiptare të futbollit, traineri De Biasi si dhe kryeministri Rama.

Drejtuesi i emisionit paraqiti një hartë, për të cilën shpjegoi se e kishte sjellë, citohen fjalët e tij: “për të parë se nga i kemi lojtarët e kombëtares, vijnë pak a shumë nga të gjitha trevat shqipfolëse. Kjo është një hartë futbollistike, mos ta ngatërrojmë me gjëra të tjera.”

Kastriot Myftaraj mendon se drejtusi i emisionit në fjalë duhej korrigjuar dhe kundërshtuar nga të pranishmit veçan nga kryeministri.

“Shqiptarët, në Kosovë po se po, por edhe në Maqedoni, Luginën e Preshevës, pra në trojet nga vinë lojtarët e kombëtares shqiptare, janë të njohur ligjërisht si shqiptarë, jo si shqipfolës. Sipas nenit 3 të Kushtetutës së Kosovës, Republika e Kosovës përbëhet nga shqiptarët (jo nga shqipfolësit) dhe komunitetet e tjera. Në dokumentet zyrtare të shtetit maqedon, shqiptarët e Maqedonisë quhen “shqiptarë” dhe jo “shqipfolës”. Edhe në dokumentet zyrtare të Serbisë, shqiptarët e Luginës së Preshevës quhen “shqiptarë” dhe jo “shqipfolës”. Pra, Shqipëria nuk ka përse i quan “shqipfolës” bashkëkombasit e vet, që jetojnë në trevat e tyre përtej kufirit shtetëror – thotë Myftari dhe shton:

“Pikërisht në Top Channel ka qenë i ftuar para disa viteve politikani serb i Kosovës Oliver Ivanoviç, i cili ka folur në gjuhën shqipe, madje në mënyrë shumë më korrekte se Manushi, që e përzien shqipen me spanjishte, italishte, pa përmendur anglishten. Oliver Ivanoviç, i cili sot është në burg për krime lufte ndaj shqiptarëve të Kosovës, është padyshim një shqipfolës. Ndonëse Manushi tha se nuk duhet ta ngatërrojmë hartën me gjëra të tjera, duke nënkuptuar ndryshimin e kufijve shtetërorë, ai u ngatërrua pikërisht në gjëra të tjera – ironizon publicisti kontrovers.

Në reagimin e tij Myftari thotë se “jo vetëm Manushi se edhe Top Channel e përdor rëndom fjalën “shqipfolës” për shqiptarët e përtej kufirit”.

Nëse nuk kërkohet ndjesë, atëherë lojtarët e kombëtares duhet të shpallin bojkotin ndaj Top Channel – përfundon Myftaraj