Gafat e gjyqtarit Martin Atkinson që bindën KAS të na japë tre pikët

Martin Atkinson, arbitri që në njëfarë mënyre u bë shkaktari i humbjes së Shqipërisë në dy shkallët e gjyqësorit të UEFA-s, është kthyer pa dashjen e tij në arsyen e vendosjes së drejtësisë. Për kujtesë, ishte raporti i anglezit ai që dëmtoi kuqezinjtë në Disiplinë dhe Apel, pasi ai kishte shkruar që përfaqësuesja e drejtuar nga trajneri De Biazi refuzoi të rikthehej në fushë.

Bazuar në këtë skenar e humbëm ndeshjen në tavolinë 0-3, vendim i cili u përmbys nga Gjykata e Arbitrazhit Sportiv. “Panorama Sport”, duke iu referuar “burimeve të sigurta” shkruan se dëshmia e “bilbilit” anglez ishte pika që ktheu mendimin e tyre për t’i dhënë Shqipërisë fitoren në tavolinë.

Pjesë nga dëshmia e Atkinsonit para panelit të CAS-it:

U komunikuat futbollistëve të Shqipërisë së ndeshja mund të vazhdohej në kushte të pranueshme sigurie dhe se ata duhet të riktheheshin në fushë?

I pyeta nëse ata mund të vazhdonin lojën dhe më thanë se nuk ishin në gjendje për ta bërë një gjë të tillë.

I ratë bilbilit në tunel, për të njoftuar rifillimin e lojës?

Jo.

Pritët nëse njëri prej ekipeve do të shkonte me ju në mesin e fushës?

Shkuam në fushë së bashku me futbollistët e kombëtares së Serbisë.

Pritët 45 minuta që ekipi kundërshtar të futej?

Jo.

Mendoni se keni zbatuar procedurën me saktësi dhe urdhri për të rifilluar lojën ka qenë i qartë?

(Nuk përgjigjet)