SHËNIM: Garë ditëlindjesh!

Një ditë pasi opinionit iu servirën detaje nga 50 –vjetori i Ramës, erdhi një tjetër ditëlindje si karshillëk ndaj së parës: ajo e “teta Lilit”, pra zonjës Liri Berisha, bashkëshortë e pandarë, siç thuhet, në të mirë e në të keq, e Sali Berishës. Nuk ka qenë ajo, por “princi” i saj blu për jetë të jetëve, që nën ethet e një narcizmi të papërmbajtshëm që ja provokon FB dhe sa e sa arsye të tjera, vendos të bëjë publike, një gjë krejt të panevojshme për të qenë prezente në ujrat e lajmeve ditore ku gurgullojnë sa e sa marrëzi të përditshmërisë sonë.

Në thelb, ditëlindjet nuk kanë ndonjë gjë për t`u gëzuar, për t`u harbuar e për ta ndarë këtë me miq, shokë, e aq më pak më bashkëatdhetarë. Ajo ka nuancat e një feste më tepër fëminore, me theks naiv, por pas një fare moshe, sidomos pas të dyzetave, ditëlindjet të fusin të dridhurat. Por dhe në u festofshin, nuk ka pse të imponohen prej protagonistëve si çështje me interes publike.

E Lilit jo e jo, por as e Ramës nuk i intereson kujt, e po kështu ajo e çdo figure publike, nëse ata mendojnë se miletit nuk i zë gjumi mbi moshën, sa i bëri, ku do e feston, me kë, ç`ka zgjedhur të vesh atë mbrëmje, e të tilla e të tilla. Por duket se në garën e gjithanshme, me kush jam unë e kush je ti, po futen dhe ditëlindjet. Ja, nëse Rama ndau me publikun ditëlindjen e tij, Berisha ju përgjigj shpejt e shpejt me atë të bashkëshortes, ndërsa pritet të vijojë ditët e ardhshme me një sërë ditëlindjesh në familje e fis, për të angazhuar ndoshta dhe partinë në këtë fushatë: duhet një listë ditëlindjesh!  / E.H.