Shkëlzen Gashi nuk po kalon një moment të mirë te Bazeli. Ai nuk po gjen hapësirë te kampionët e Zvicrës, me të cilët sezonin e shkuar u shpall “Këpuca e Artë”.
Këtë çmim individual, si shënuesi më i mirë i Superligës helvete, mesfushori me tipare sulmuese i kombëtares shqiptare e kishte fituar edhe edicionin pararendës. Ndryshimi i trajnerit te Bazeli e ka spostuar jashtë vëmendjes Gashin, pavarësisht aftësive të tij shënuese.
Ngushëllimin e ka gjetur në kampin kuqezi, ku ai ka pasur një rol mjaft të rëndësishëm në suksesin historik të Shqipërisë, kualifikimin për në finalet e “Euro 2016”. Goli i dytë ndaj Armenisë, shënuar prej tij në “Elbasan Arena”, mund të konsiderohet si një “kapërcyell” drejt shkuarjes së Shqipërisë në Francë, vitin e ardhshëm.
Mirëpo, fitorja e fundit e fushatës kualifikuese në Jerevan, ndaj të njëjtit kundërshtar, me shifrat 3-0, ishte “vula” e një arritjeje kombëtare, e shumëpritur nga të gjithë, raporton Telesport.
Përveç sekuencave filmike të kësaj ndeshjeje, delirit dhe shampanjës në dhomat e zhveshjes, që u pasua më tej në Tiranë me pritje zyrtare dhe festë madhështore me tifozët, Shkëlzen Gashi ka edhe një “suvenir” të veçantë nga ndeshja e 11 tetorit, ndaj Armenisë. Ai ka arritur të marrë me vete topin, me të cilin u luajt në Jerevan. “Ky top na ndihmoi për të shkruar historinë”, – shkruan Gashi në statusin e tij të hedhur në Facebook ditën e sotme, ku ka publikuar edhe foton e topit, të firmosur nga ana e tij.
https://www.youtube.com/watch?v=wjI1uZ2FNbg
Do zoti 2016 te te sjelli fat .mbare e mire z.gashi