BE dhe SHBA akuzojnë Ukrainën për deficite në demokraci. Por… Presidenti ukrainas Janukoviç do të shkojë të hënën më 25 shkurt në takimin e nivelit të lartë të Bashkimit Evropian që mbahet në Bruksel. Do të konfrontohet edhe një herë me çështjen si i trajton drejtësia ukrainase kundërshtarët politikë të qeverisë në pushtet? (ish-kryeministrja ukrainase Julia Timoschenko ndodhet ende në burg dhe dënimi i saj u kritikua ashpër në takimin e lartë BE- Ukrainë që u mbajt në dhjetor të 2012-ës). Me gjasa, jo. Këtë e la të kuptohet Komisari i BE-së për çështjet e zgjerimit Stefan Füle, gjatë vizitës së tij në Kiev në fillim të shkurtit.
Është një temë e re, për të cilën të dy palët duken shumë të interesuara: bëhet fjalë për nxjerrjen e gazit në Ukrainë. Në mënyrë që të zbutet varësia e Europës nga furnizimet e gazit rus, Ukraina kërkon që me ndihmën e firmave perëndimore të përdorë rezervat e veta të gazit dhe të mos shërbejë vetëm si pikë tranziti e gazit rus. Dhe BE, e cila e sheh më të lehtë me sa duket të merret me Kievin se me Moskën është e gatshme që të ndihmojë Ukrainën në modernizimin e gazsjellësit. Një projekt pilot është duke u zbatuar aktualisht me pjesëmarrjen e bankës Deutsche Bank dhe të Ferrostaal-it, ndërtuesit të impianteve – njofton media gjermane. Në janar të 2013-ës, Kievi nënshkroi një marrëveshje edhe me koncernin Shell. Po ashtu janë duke u bërë biseda për biznese miliardash me gjigandët amerikanë të energjisë, Exxon Mobil dhe Chevron. Komisari i BE-së, Günther Oettinger tha gjatë në Konferencën e Sigurisë që u mbajt në fillim të shkurtit në Mynih, se Ukraina do të eksportojë një ditë gaz për Evropë. Edhe pjesëmarrësit e tjerë të konferencës treguan entuziazëm. Emri “Timoshenko”, nuk u dëgjua më, të paktën në fjalimet publike. (D.W.)