Familjarët e viktimave të shpërthimit në Gërdec kërkuan të organizonin një protestë dhe sipas ligjit të njoftonin policinë për këtë veprim, por kërkesa s’është marrë në dorëzim prej bluve
“Sot më datë 18 shkurt, përgjatë të gjithë ditës Drejtoria e qarkut Tiranë refuzoi të marrë në dorëzim kërkesën e Shoqatës së Familjarëve të viktimave të Gërdecit. Kërkesa për një datë tjetër do të tentohet nga shoqata të dorëzohet ditën e nesërme”. Kjo është deklarata e familjarëve të viktimave të Gërdecit të cilët kanë dashur të kërkojnë leje nga policia e Tiranës për të bërë një protestë përpara Prokurorisë së Përgjithshme lidhur me vendimin e dhënë për të akuzuarit e ngjarjes së 15 marsit 2008. “Akti i mospranimit është i paprecedentë dhe tenton të dekurajojë qytetarët e lirë që të tubohen për kërkesat të tyre të ligjshme”, thuhet në deklaratë.
Njoftimi thotë se “shoqata e “Familjarëve të viktimave të shpërthimit, Gërdec, do të organizojë ditën e martë, datë 19.2.2013 prej orës 12:00, përpara Prokurorisë së Përgjithshme Tiranë, një protestë ndaj vendimit të këtij organi për ngjarjet e datës 15 mars 2008”.
“Numri i pjesëmarrësve në këtë protestë parashikohet të jetë 20-50 persona. Theksojmë që veprimtaria është parashikuar të zhvillohet pa cenuar trafikun apo qetësinë publike”, thuhet në njoftim.