Duhej të kishte firmosur ditën e djeshme, më pas të ishte prezantuar tek ekipi i Tiranës, por nuk ka ndodhur kështu me mesfushorin shkodran, Gilman Lika. Lojtari që vetëm dy ditë më parë u “divorcua” zyrtarisht me Vllazninë është ende një futbollist i lirë dhe pa kontratë, sepse nuk ka firmosur me asnjë ekip tjetër.
Ai ka arritur një akord paraprak, që ka të bëjë edhe me pagesën në masën 70-80 % të borxhit të kaluar nga Tirana, por duket se mosshlyerja ka bërë që të shtyhet edhe hedhja e firmës në kontratë. Megjithatë, i kontaktuar nga “telesport.al”, Lika nuk do ta konsideronte këtë gjë si arsyen e shtyrjes së hedhjes së firmës me bardheblutë, duke bërë të ditur se ka vendosur që t’i kushtojë vetes dhe familjes pak relaks këtë fundjavë jashtë kufirit shqiptar.
“Është e vërtetë se e kishim lënë të firmosnim ditën e enjte, por për disa arsye kjo nuk ndodhi. Unë aktualisht ndodhem në Mal të Zi bashkë me familjen, të cilës vendosa t’i kushtoj pak kohë, ngaqë tashmë do të nisë periudha e grumbullimeve dhe nuk do të kem më mundësi për të qëndruar me të. Sa për firmosjen e kontratës, do të pres thirrjen e drejtuesve të Tiranës. Ajo mund të vijë nga e hëna”, ka thënë mesfushori shkodran.
Gjithsesi, Gilmani akoma vazhdon të jetë një futbollist i lirë dhe nuk përjashtohet mundësia që të ketë ndonjë kontakt me ekipe të tjera. Madje, pse jo, edhe ndryshim kursi. Kuptohet që preferencat janë për jashtë vendit dhe 28-vjeçari ditët e fundit ka marrë disa sinjale të tilla nga ekipe të ndryshme, megjithatë kjo mbetet për t’u saktësuar në vijim. Nëse Tirana nuk shpejton, Lika mund të ndryshojë adresë.