‘Gishtpremi’ i Lulzim Bashës dhe besëprerët e PD-së

A do ta shoqërojnë bodigardët dhe deputetët e tij, kreun e PD-së ashtu si në protesta dhe në burg? Çeta e Lulzim Bashës i shpall “luftë” Prokurorisë së Shtetit, Qeverisë dhe Partisë Demokratike. Të implikuar me çështjen “Babale” mbi 15 persona të lidhur direkt me Lulzim Bashën.

Tashmë, hetimi i çështjes “Babale” po zbulon zinxhirin e gjatë të bashkëpunëtorëve të lidhur me Lulzim Bashën, që fillojnë me Ervin Salianjin, Enkelejd Alibeajn, Gazmend Bardhin, vazhdon me Jetmir Olldashin, Albert Veliun, Fredi Alizotin, Erzen Breçanin, Florenc Hoxhën, Sali Lushën dhe ka përfshirë në përgjime një numër të madh personash si, A.M., A.GJ., K.V., R.K., E.M., dhe të tjerë, të cilët në bashkëpunim kanë marrë pjesë në skenarin e pregatitur, që filloi me përndjekje të organizuar ndaj vëllait të Ministrit të Brendshëm, krijimit të rrethanave dhe përgjimit të rremë, premtimin, pagimin dhe strehimin e dy aktorëve të përgjimit dhe arratisjen në Kosovë të Albert Veliut (Babales). Të gjithë, në bashkëpunim me njëri- tjetrin, si njw repart paramilitar i organizuar me zinxhir komandues, janë zbuluar të kenë protagonizëm të veçantë në ngjizjen dhe vënien në dispozicion të skenarit më të madh konspirativ të pas viteve ‘90 kundër një qeverie, një njeriu apo politikani, kundër një Partie. Dhe nuk është Partia Socialiste viktima e këtij skandali politik dhe komploti shtetëror, por Partia Demokratike.

Skandal politik se 15, 20, apo 30 gishtprerë me në krye Lulzim Bashën, kanw prerë në besë e shpresë me mijëra demokratë që aderojnë me teserë apo shpirt në PD.

Skandal dhe komplot shtetëror, se këta 15, 20 apo 30 kodoshë, me në krye një kryekodosh, po vendosin pikëpyetje mbi të gjithë sistemin e institucioneve shtetërore, të drejtësisë dhe të medias në Shqipëri.

Po tallen kodoshët me gjithë opinionin publik, me logjikën elementare të të gjithëve ne, me dhe pa parti. Po luhet me pritshmërinë dhe ndjenjat e 300 apo 600 mijë demokratëve.

Po ku janë demokratët që të marrin zvarrë për zhelesh, apo ato të plumbit ballit, kur bëhet fjala për parime apo për kufij që s’mund të kalohen nga askush? Ku është Jozefina, Astriti, Ridvani apo Mesila? Ku jane Azemët e PD-së? Apo kanë mbetur vetëm gishtpremët aty?!

Pardje u shfaq në një televizion kombëtar regjistrimi kallp i radhës, kësaj here i kryer brenda në oborrin e Partisë Demokratike, ndaj të akuzuarit, të penduarit, të shëmtuarit Fredi Alizoti, ku rolin e Çimkës e luante “gishtpremi” i quajtur Florenc Hoxha, bodigard i Lulzim Bashës, kur ky bashkë me këtë kodosh dolën ne miting. Ju kujtohet mitingu i datës 26 maj?

Ku është Sali Berisha, që nuk i honeps çimkat? Përse nuk i flet demokratëve si dikur, kur i ndërseu përbuzjen ndaj Spartak Ngjelës me çimkë në dorë?

Përse nuk flasin demokratët e thjeshtë që kanë pritur me orë dhe vite te kafja e tyre brenda në oborr? Te kafeja që e ka pushtuar Babalja! Te e njëjta kafe ku gjerb Fredi demokrat dhe Fredi “babale”!

Më e rëndë është se Çeta e Lulzim Bashës i ka shpallur “luftë” Prokurorisë së Shtetit, po aq sa Partisë Demokratike.

Historia e Babales u etiketua në fillim me shaka si “telenovelë” nga seria e diskutimeve që ngjalli përgjimi i nxjerrë në muajin maj nga selia e PD-së. Sot, shakaja dhe telenovela nuk lënë më vend suspanse për kuriozitetin e publikut. “Babalja” ka marrë përmasa të rënda dhe shumë serioze. Me përgjimin e aktorit të përgjimit, “Babalja” është kthyer në një kyevepër politiko-kriminale. Ngjarja tregon se si një tabor i tërë politik me individë të lidhur direkt me kryetarin e Opozitës shqiptare, kanë kryer të gjithë në bashkëpunim një krim shtetëror.

I ashtuquajturi Gishtpremi i Partisë Demokratike, ish zyrtar i lartë në pushtetin e saj, është kapur në implikime dhe dyshohet se ka kryer veprime të rënda në manipulimin dhe servirjen e skenarit “Babalja” bashkë me Sali Lushën, Erzen Breçanin, Jetmir Olldashin, Ervin Salianjin dhe të tjerë, të orientuar direkt nga urdhrat e Lulzim Bashës.

Të gjithë bashkë janë përfshirë në një krim apo konspiracion shtetëror, të cilin Kodi Penal shqiptar nuk e ka parashikuar.

Deputeti i Partisë Salianji takon Babalen jashtë dhe brenda PD-së. Bodigardi i Kryetarit të Partisë, e takon Babalen brenda dhe jashtë PD-së. Gazetari i partisë takon Babalen brenda dhe jashtë PD-së. Fredi Alizoti komunikon me njerëzit e partisë, Erzenin dhe Saliun, kur ata janë brenda dhe jashtë oborrit të PD-së. Militantët e partisë A.M. dhe A.GJ.,sistemojnë Babalen që të kapërcejë oborrin e PD-së, madje edhe atë të Shqipërisë.

Në konspiracionin shtetëror janë përfshirë edhe individë nga Kosova, të cilët kanë bashkëpunuar me personat shumë të afërt pranë kryetarit paramilitar të Partisë Demokratike, duke arritur të arratisin Albert Veliun jashtë kufijve të Shqipërisë, me qëllimin e moskapjes së tij nga ana e Policisë së Shtetit.

Sipas skenarit të arratisjes së Babales direkt nga oborri i PD-së, në operacionin e shpëtimit të tij nga drejtësia shqiptare, kanë marrë pjesë direkt njerëzit paramilitarë pranë Lulzim Bashës, me dy mjete dhe mbi 8 persona që kanë bashkëpunuar në kufirin shqiptar dhe matanë tij në Kosovë.

Dje, Babalja u kap dhe të gjithë do presin kthimin e tij në Shqipëri. Por diskutimi do vazhdojë dhe avokatët e Babaleve do hedhin dyshim mbi letrat, procesverbalet, provat apo dëshmitë e prokurorisë dhe policisë.

Padyshim që dyshimi do mbetet në oborrin dhe shtëpinë e çdo shqiptari, ashtu si Babalja dhe Alizoti do mbeten në oborrin e PD-së së Lulit, jo të demokratëve të vërtetë. Se në këtë oborrin e ri, nuk mund të futesh pa dëshirën e disa kodoshëve që merren me politikë dhe krim,dhe kjo nuk mund të vihet në dyshim nga asnjë ekspertizë.

Shqiptaret sot duhet të dinë sa faj ka Lulzim Basha në gjithë këtë histori; jo sa kafe ka paguar  në klubin e oborrit të PD-se për Babalen dhe Alizotin. /E.K/DITA