Një nëndetëse gjermane që u fundos gjatë Luftës së Parë Botërore është gjetur në Detin e Veriut dhe zyrtarët besojnë se brenda mjetit mund të ketë 23 trupa.
Nëndetësja e llojit UB-II thuhet se është në gjendje të mirë dhe është në një thellësi 30 metra në brigjet belge.
Autoritetet po e mbajnë të fshehtë vendndodhjen ekzakte të nëndetëses për të shmangur grabitjen apo dëmtimin e mjetit që besohet të jetë fundosur për shkak të një mine.
Rreth 23 trupa mendohet të jenë në bordin e nëndetëses dhe për këtë, autoritetet belge kanë njoftuar ambasadën gjermane. Edhe pse në gjendje relativisht të mirë, mjeti ka pësuar dëme në pjesën e sipërme të tij.
Kulla e mbrojtjes përshkruhet si e paprekur dhe periskopët janë ende të dukshëm. Dy tuba siluri gjithashtu u gjetën të hedhur disa metra më larg nëndetëses së fundosur.
11 nëndetëse gjermane nga periudha e Luftës së Parë Botërore janë gjetur në ujërat e Belgjikës, por ky mjet raportohet të jetë në gjendjen më të mirë. Nëndetëset UB-II u ndërtuan në vitet 1915 – 1916 dhe arrinin të zhyteshin në thellësi deri në 50 m.