Gjermania kërkon largimin e shefit të CIA-s në Berlin

Skandali i spiunazhit që largon çdo ditë e më shumë Berlinin nga Uashingtoni ka shkaktuar viktimën e parë. Zëdhënësi i qeverisë gjermane, Steffen Seibert, njoftoi të enjten se i ka kërkuar përgjegjësit për Shërbimin Sekret të stacionuar në Ambasadën Amerikane të largohet nga vendi. Sipas Reuters reagimi gjerman vjen një ditë pasi Prokuroria Federale Gjermane urdhëroi të bëhet një kontroll në banesën dhe zyrën në Ministrinë e Mbrojtjes në Berlin të një personi të dytë që dyshohet se ka punuar si spiun për Uashingtonin. Javën e kaluar u arrestua dhe një agjent i dyfishtë, i cili pretendohet se i ka shitur informata CIA-s. Kërkesa është rezultat i hetimeve të prokurorisë gjermane dhe diskutimeve në muajt e fundit mbi aktivitetet e shërbimeve informative të SHBA-së në Gjermani, sipas asaj që tha Seibert. Zëdhënësi i qeverisë tha se Gjermania e konsideron “të domosdoshme” që të punojë intensivisht për çështjen e sigurimit me aleatët e saj dhe veçanërisht me Shtetet e Bashkuara, por paralajmëroi se një bashkëpunim i tillë duhet të “bazohet në besim dhe transparencë”. Disa ditë pas arrestimit të një punonjësi të shërbimeve të inteligjencës së huaj që pranoi se po i kalonte dokumente një personi amerikan, Prokuroria gjermane deklaroi të mërkurën se është duke hetuar mbi një spiun të dyshuar amerikan që është infiltruar në ushtri. Kancelarja gjermane Angela Merkel, mbajti të enjten deklaratat e saj më të forta që prej fillimit të skandaleve të spiunazhit amerikan kur pohoi se “të spiunosh aleatët” është humbje energjie. “Kemi shumë probleme, duhet të përqendrohemi në gjërat e rëndësishme”, tha kancelaria gjatë një seance dëgjimore me Kryeministrin moldav, Iurie Leanca. Ajo shtoi se prioritetet duhet të përfshijnë çështjen e përballjes së sfidave në Siri dhe të luftojnë terroristët dhe se besimi mes aleatëve duhet të forcohet. “Por sot në shekullin XXI duhet të pyesim veten se cilat janë detyrat e shërbimeve sekrete. Sot kemi kërcënime të reja asimetrike dhe besoj se në këto kohëra, shumë më të paparashikueshme, krijimi i besimit mes aleatëve është diçka jetike”, ka theksuar kancelarja. Rasti i dy spiunëve të pretenduar sos durimin e gjermanëve pas një viti të komplikuar për marrëdhëniet mes Uashingtonit dhe Berlinit që filloi me zbulimet e ish anëtarit të Agjencisë Kombëtare të Sigurisë (NSA) amerikan Edëard Snoëden. Në dokumentet zyrtare të filtruara tregoheshin qartë disa aktivite spiunazhi që përfshinin edhe një përgjim të telefonit të Merkel.