Deputeti gjerman në Parlamentin Evropian Bernd Posselt, thotë se duhet që të refuzohet platforma e Serbisë për komunat me shumicë serbe në Kosovë, pasi plani i Ahtisaarit sipas tij, është një ofertë shumë e mirë për të drejtat e pakicës serbe.
“Mendoj se baza… Kushtetuta e Kosovës është e mjaftueshme, është një bazë shumë e mirë përfshirë edhe planin e Ahtisaarit për të drejta të shkëlqyeshme të pakicave” ka theksuar Posselt.
Sipas tij modeli i Ahtisaarit për të drejtat për pakicat në Kosovë, duhet të përdoret edhe në jug të Serbisë, përkatësisht për shqiptarët në Luginën e Preshevës.
“Kur unë shkoj në Serbi ata flasin për të drejtat e pakicave, por ato atje nuk ekzistojnë. Unë e njoh shumë mirë Luginën e Preshevës ku nuk ka të drejta të pakicave. Unë mendoj se nuk na duhen standarde të dyfishta. Ne kemi nevojë për standarde të njëjta për serbët në jug të Kosovës, për serbët në veri të Kosovës, por edhe për shqiptarët në Serbi” ka shtuar ai.
Deputeti gjerman thotë se Serbia nuk do të mund të anëtarësohet në Bashkimin Evropian pa e njohur pavarësinë e Kosovës. Ndërkohë Bernd Posselt ka paralajmëruar se pas anëtarësimit të Kroacisë në BE, do të ketë një lloj pushimi sa i përket zgjerimit të BE-së, i cili ndërlidhet me lodhjen e një pjese të politikëbërësve evropianë me zgjerimin e kufijve, sidomos tani kur BE po përballet me krizën e brendshme ekonomike dhe financiare.