Gjika: Ja e ardhmja e Flamurtarit të ri

Kryetari i Bashkisë së Vlorës, Shpëtim Gjika, shpjegon në një intervistë, të rejat më të fundit në lidhje me klubin Flamurtari.

Cila ishte pjesa që i përkiste Klubit Flamurtari në mbledhjen e Këshillit Bashkiak të Vlorës?

Pikë së pari, ishte miratimi i buxhetit, që i takon “Shoqërisë Aksionere Flamurtari” për sezonin e ardhshëm, një shumë e cila është 47 milionë lekë (të reja).

E dini që kjo është shifra më e lartë që një bashki ka miratuar për sezonin e ardhshëm?

Besoj se kemi bërë një gjë të drejtë. Mendoj se futbolli i qytetit duhet ndihmuar brenda rregullave dhe kushteve financiare nga pushteti vendor. Jam në dijeni të buxheteve të tjera, por secila bashki ka strategjinë e saj në lidhje me këtë çështje.

A ka probleme financiare për momentin në klub?

Jo, sidomos pagesat janë korrekte më së fundi dhe kjo është në arritje duke pasur parasysh faktin që Bashkitë në këto tre muaj kanë kaluar vështirësi nga pikëpamja e likuiditeteve.

Kur do të privatizohet stema e klubit?

Besoj se në mbledhjen e radhës së Këshillit Bashkiak do të bëhet privatizimi i stemës së klubit, pra aktivitetit, dhe kjo do t’i kalojë në pronësi kompanive turke të interesuara tanimë.

Kush do ta administrojë më pas klubin?

Sigurisht që kompania e re do të bëjë administrimin e klubit nga pikëpamja sportive, ajo do vendosë më pas për buxhetet sezonalë, kontratat, lojtarët, politikat dhe gjithçka që kanë të bëjnë me këtë pjesë.

Cili do të jetë roli juaj?

Jam dhe do të jem gjithnjë pranë klubit dhe skuadrës.

Kuptohet, që prania juaj si tifoz ka ndihmuar në gjithë këtë rrugëtim…

Ajo që kam dashur dhe dua të përfundoj është që, Flamurtari dhe sporti i qytetit të mos varet nga humori i duhur ose jo i një kryetari, qoftë dhe ky shumë dashamirës, por të marrë një rrugë serioze drejt biznesit.

Çfarë do të ndodhë me asetet?

Asetet nuk do të jenë pjesë e privatizimit të stemës, por klubi Flamurtari dhe drejtuesit e rinj të aktivitetit do të përdorin këto asete.

Cilat janë asetet për momentin?

Stadiumi aktual, aneksi stërvitor, Pallati i Sportit dhe kompleksi në Pyllin e Sodës.

A do të ndërtohet një stadium i ri?

Investitorët turq të cilët do të privatizojnë stemën e klubit, gjithashtu duan të investojnë në këtë drejtim dhe ju e dini këtë. Mendohet të ndërtohet një stadium i ri në “mbeturinat” e Pyllit të Sodës, ju parathem që nuk do të pritet asnjë pemë, dhe një rehabilitim i Pallatit të Sportit.

A do të jetë një stadium 20 mijë vende?

Unë do të propozoja të ishte 12-13 mijë vende, por konsulentët tanë na kanë sugjeruar që të jetë në këtë masë. Unë nuk do të jem kundër çdo zgjedhjeje.

Çfarë do të bëhet me stadiumin aktual?

Propozimi im është të prishet së bashku me aneksin dhe të ndërtohet lulishte për fëmijët e familjarët.

Nuk do të ndërtohen pallate?

Absolutisht, jo!

A do të jetë Kryeministri i Turqisë, z.Erdogan, në stadium në 17 maj për finalen e Kupës?

Jo, nuk do të jetë, do të jetë në 14 maj në Tiranë dhe do të takohet me kryeministrin Rama.

Do të diskutohet për këtë projekt?

Po, ju garantoj që do të diskutohet për projektin “Vlora Sport” dhe pjesë e kësaj pakete është stadiumi dhe një kompleks më i gjerë sportiv në hapësirën përreth stadiumit.

Pra, “Vlora Sport” dhe stadiumi janë investim turk që nuk kanë të bëjnë juridikisht direkt me Klubin Flamurtari?

Po, e saktë, por Flamurtari do t’i përdorë këto ambiente për të luajtur futboll.

Ndërkohë, kompanitë e investimit në infrastrukturë dhe ato që do të privatizojnë stemën e klubit janë të njëjta?

Po, fatmirësisht po!

Kur përfundon ky projekt i gjithanshëm?

Privatizimi i stemës së klubit dhe kalimi i stemës tek investitorët turq kalon që mbledhjen e radhës. Ndërtimi i kompleksit sportiv dhe stadiumit mund të dojë 2 -3 vite.