Kryetari i PSD-së, Skënder Gjinushi ka bërë përmbledhjen e vitit 2012 duke e perifrazuar atë si vitin e korrupsionit. Ai renditi një seri dështimesh të qeverisë duke nisur nga Statusi e deri situata ekonomike. “Shqipëria mbylli një vit historik, atë të 100-vjetorit të Pavarësisë, por ky vit fatkeqësisht ishte edhe viti i krizës ekonomike, viti i dështimit të qeverisë për marrjen e statusit të vendit kandidat, viti i dështimeve spektakolare, në privatizimet më madhore si nafta dhe energjia elektrike. Viti i ligjërimit të korrupsionit dhe kthimit të tij në një virtyt dhe cilësi për politikanët. Ishte viti i rënies tërësore të institucioneve të pavarura nën kontrollin e klanit qeverisës”, deklaroi Gjinushi.
Refuzimi i Statusit
Komenti i tij për refuzimin e marrjes së statusit të vendit kandidat vijoi edhe më tej. “Refuzimi i statusit të vendit kandidat për tre vjet radhazi erdhi për shkak të vjedhjes së votës, për shkak të korrupsionit rekord, për shkak të degradimit të Kuvendit, për shkak të keqpërdorimit të televizionit publik dhe administratës publike prej qeverisë, që tregojnë për çdo shqiptar normal se ka vetëm një përgjegjës për këtë dështim, që është qeveria aktuale. Kjo tregon se rrugën shqiptarëve drejt Europës ua kanë zënë të korruptuarit”, nënvizoi Gjinushi.
Urimi i Gjinushit
Nuk mungoi në bashkëbisedimin e fundvitit me median edhe urimi i Skënder Gjinushit për 2013-ën. “Urimi më i mirë për vitin 2013 do të ishte një qeveri e re pa të korruptuarit e koalicionit PD-LSI”.