Dy 34-vjeçarë janë vënë në pranga nga policia e Gjirokastrës, duke bërë që të hidhet dritë edhe mbi thyerjen e zyrës së OMONIA-s dje në këtë qytet. Sipas policisë, Adriatik Dumi dhe Gjergji Koçi kanë hyrë gjatë natës në dhomat e spitalit “Omer Nishani”, ku kanë vjedhur sendet personale të të sëmurëve. Të dy të arrestuarit kanë hyrë në pavijonet e Kirurgjisë dhe Patologjisë duke kontrolluar në dhomat e pacientëve, me qëllim vjedhjen e sendeve të tyre personale dhe më pas janë larguar, duke thyer xhamat e zyrës se Omonias, ku dhe kanë kaluar natën. Sipas policisë, dy të arrestuarit ishin dënuar edhe herë të tjera për vjedhje. Ata janë të dy përdorues droge.