Kush e vrau Skerdilajd Konomin? 5 vjet pa përgjigje

Kanë kaluar 5 vite nga vrasja mafioze e gjyqtarit të Vlorës, Skerdilajd Konomi dhe ende autorët nuk janë vënë para drejtësisë.

Gjyqtarë të Gjykatës së Vlorës zhvilluan sot homazhe në vendin ku më 9 shtator 2011 u ekzekutua Konomi.

Kryetari i Gjykatës së Vlorës, Skënder Haluci, tha se vrasja e gjyqtarit Konomi jo vetëm nuk është në gjykim, por as nuk është hetuar.

“Me ngritjen e institucioneve të reja gjyqësore të ketë hetim të mirëfilltë për rastin Konomi” tha ai.

Vrasja e gjyqtarit Skerdilajd Konomi i cili humbi jetën nga një shpërthim eksplozivi në qendër të qytetit të Vlorës është hetuar që prej shtatorit të vitit 2014 nga Prokuroria e Krimeve të Rënda në Tiranë.

Prokuroria hetoi dy pista kryesore: Vrasje për shkak të detyrës dhe vrasje për shkak të një procesi gjyqësor ku Konomi përfaqësonte familjarët e tij në një çështje pronash të trashëguara në zonën e Hamallajt në Durrës.

Pas verifikimeve të kryera nga Krimet e Rënda u rrëzua pista e vrasjes për shkak të punës së tij si gjyqtar, duke lënë si motivin më të mundshëm atë të vrasjes për shkak të pronësisë.