Policia greke ka kryer një operacion masiv për të shkatërruar një grup kriminal greko-shqiptar të dyshuar për dy vrasje dhe një seri grabitjesh në Athinë. Kështu njoftojnë mediat greke.
Sipas policisë greke, ky grup vepronte në periferitë e Athinës. Dy shqiptarët e arrestuar janë të moshës 28 dhe 43 vjeç dhe i treti është grek, 43 vjeç.
Policia njoftoi se një tjetër pjesëtar i kësaj bande, një shqiptar 27-vjeçar, aktualisht ndodhet në burg me akuzën e grabitjes.
Hetimet kanë treguar se banda është përgjegjëse për vrasjen e një burri 53-vjeçar grek dhe të një gruaje të moshuar, vrasje të kryera në vitin 2005. Të dy viktimat ishin vrarë gjatë plaçkitjes me dhunë që bëri kjo bandë kriminelësh.