Grida Duma: E pranoj humbjen, por Dako manipuloi votat

Tri ditë pas mbylljes së numërimit të votave në Durrës, kandidatja e djathtë për Bashkinë e Durrësit, Grida Duma ka pranuar humbjen, por nuk ka pranuar të urojë kundërshtarin e saj për fitoren, kandidatin e majtë, Vanghush Dakon.

Duma ka thënë Dako është mbështetur nga një makineri shtetërore e paligjshme, duke arritur të manipulojë edhe vërtetësinë e votave.

“Nuk ishte një garë për të marrë pushtetin e Bashkisë së Durrësit, por një garë për të çliruar Durrësin, ku qindra qytetarë jetonin nën ankthin e papunësisë dhe heqjes nga puna nga administrata. Nuk kisha përballë një kundërshtar që të mbante profilin e intelektualit, pot një shërbyes të vogël, që pati mbështetjen e makinerisë së drejtorëve dhe të shtetit, ku arriti të manipulonte vërtetësinë e votës”, – akuzoi Duma

“Unë e njoh humbjen dhe e pranoj, por realiteti dhe e vërteta duhen thënë, që janë rezultat i qindra mijëra mesazheve të qytetarëve durrsakë, që më vijnë dhe më thonë se nuk ka mundësi që rezultati të jetë ky, – vazhdon Duma. – Unë e njoh përgjegjësinë e humbjes dhe u them të gjithëve të vazhdojnë në besojnë te puna dhe meritokracia, jo tek i forti dhe mashtrimi. Ky është fillimi i një beteje të madhe, nuk është humbja e asgjëje. Ky nuk është rasti i urimit të fitores, sepse këtu nuk ka lidhje fare kjo fitore. Ky është qëndrimi im, edhe pse kandidatët e tjerë humbës të PD uruan kundërshtarët e tyre”, – përfundoi Grida Duma.