Grushte dhe fyerje në mbledhjen e Këshillit Bashkiak të Himarës. Në mbledhjen e djeshme, këshilltari i PBDNJ-së, Gjike Stramarko, ka paraqitur kërkesën për hapjen e një guroreje në Palasë, çka është kundërshtuar me forcë nga kryeplaku i këtij fshati, Odise Dhimolea.
Qëndrimi i kryeplakut nuk është pranuar nga këshilltari i PBDNJ-së, i cili është edhe bashkëpronar i firmës që do të ndërtonte guroren. Çështja është hedhur për votim dhe pas rrëzimit të saj me shumicë votash, këshilltari i PBDNJ-së së bashku me biznesmenin Beli kanë fyer kryeplakun e Palasës. Konflikti ka degjeneruar në përdorimin e grushteve, ku më i dëmtuari ka rezultuar kryeplaku i Palasës, i cili është dërguar në spital për mjekimin e plagëve.
Dhimolea ka denoncuar më pas në polici dy dhunuesit e tij. Gazeta Shqiptare citon sot nënkryetarin e Bashkisë së Himarës, Irakli Gjicali, i cili ka qenë i pranishëm në mbledhje. Sipas tij, “kryeplaku Dhimolea ka kërkuar në emër të banorëve që përfaqëson që të mos jepet kjo leje, sepse përveçse do shkaktonte një ndotje në ambient, ishte edhe kundër frymës turistike të zonës”.