Hapet Zyra e Punës, Rama: Adresa e të rinjve që duan punë

Hapet Zyra e Shërbimeve të Punësimit. Në ceremoninë e inaugurimit morën pjesë kryeministri Rama, ministri Veliaj, ambasadori i BE në Tiranë, Etore Sequi etj. Në fjalën e tij, kryeministri Rama tha se kjo zyrë është dallëndyshja e parë e një stine tjetër në marrëdhëniet shtet-qytetar porsa i përket punësimit. Rama tha se kjo zyrë do të pasohet edhe nga të tjera në rrethet e vendit.

“Plani i ministrit Veliaj për ngritjen e zyrave të kësaj cilësie edhe në qytetet e tjera meriton vlerësimin më të lartë. Plaga e papunësisë në Shqipëri, sidomos te të rinjtë, është e thellë.

Hapja e vendeve të reja të punës është prioriteti ynë më i madh, që ka të bëjë me ndryshimin e modelit ekonomik të vendit. Eksperienca e Gjermanisë dhe vendeve të tjera, ku zyra të tilla janë pika referimi të patjetërsueshme në. Vullneti për importimin nga Gjermania falë mbështetjes bujare të Agjencisë Federale të Punësimit është një shprehje konkrete e një ambicieje shumë kurajoze dhe vullnetit të palëkundur për t’u ndarë nga farsa e këtij shërbimi që vetëm hëngri para dhe nuk dha asgjë veç korrupsionit dhe banalitetit.

Kjo zyrë do të jetë adresa e besueshme e të rinjve dhe studentëve, punëkërkuesve të hershëm apo atyre që kanë studiuar jashtë dhe kanë nevojë për orientim lidhur me mundësitë që ofron sot tregu i punës. Kjo zyrë është dallëndyshja e parë që lajmëron një stinë tjetër në marrëdhëniet e qytetarëve me punëkërkimin dhe shtetin”, tha Rama.

Sequi: BE ka investuar 16 milionë euro në këtë sektor gjatë viteve të fundit

Ambasadori i BE në Tiranë, Etore Sequi, tha se 16 milionë euro janë investuar në këtë sektor gjatë viteve të fundit, ndërsa 4.5 milionë të tjera do të shkojnë në mbështetje të formimit profesional.  

“Njerëzit e kanë gabim kur mendojnë se një i papunë shqetësohet vetëm për faktin që nuk ka të ardhura. Një njeri i papunë me zakonin e punës, ka nevojë më shumë se gjithçka për punë.

Papunësia është një problem edhe për BE dhe ajo që ne dimë është se ky problemi nuk zgjidhet brenda një nate. Vendosmëria dhe veprimet e menjëhershme janë ato që sjellin progresin.

Ky aktivitet sot është shumë i rëndësishëm në trajtimin e këtyre sfidave.  Strategjia kombëtare për punësimin do të ketë të njëjtën jetëgjatësi si ajo evropiane deri në vitin 2020. Progresi varet nga mundësitë që krijohen për njerëzit. Ne besojmë se papunësia mund të trajtohet në mënyrën e duhur duke vlerësuar arsimin dhe tregun e punës.

BE ka investuar 16 milionë euro në këtë sektor gjatë viteve të fundit dhe 4.5 milionë euro të tjera janë parashikuar për t’i dhënë mbështetje arsimit profesional dhe trajnimeve profesionale”, tha ai.

Në fjalën e tij, Ministri Veliaj vuri theksin në domosdoshmërinë e pasjes së një zyre funksionale pune, pikërisht pse punësimi është një nga prioritetet e qeverisë shqiptare, sidomos i të rinjve shqiptarë. “Për një kohë të gjatë njerëzit as nuk e dinin se ku ishte zyra e punës. Ajo ndodhej në një cep të humbur të Tiranës, ku askush nuk e gjente. Ky realitet është edhe në qytete të tjera të Shqipërisë. Qeveria e ka tre fishuar fondin e punësimit dhe shumë shpejt do të hapim një konkurs për kompanitë të cilat duan ta aksesojnë këtë fond dhe të shpërblehen në bazë të punonjësve që do të punësojnë dhe në bazë të vendeve të punës që do të hapin”.

Veliaj theksoi se me Zyrën e re të Punës fillon një marrëdhënie e re të qytetarëve me shtetin. “Është shumë e rëndësishme që të ofrojmë një shërbim dinjitoz për punëdhënësit dhe punëkërkuesit në të gjithë Shqipërinë, ku njerëzit marrin një përgjigje. Në mungesë të një vendi pune, qytetarët do të marrin një kupon, i cili u mundëson një kurs falas në qendrat e formimit professional, çka do t’i bëjë të aftë për nevojat e tregut të punes”, tha ai.

Për të lehtësuar këtë qasje është ristrukturuar procesi i shpërndarjes së shërbimeve, shërbimi në këtë zyrë ofrohet në tre nivele, në përputhje me modelin e ri të ofrimit të shërbimeve:

1. Ofrohet informacion mbi çështje të lidhura me tregun e punës, të cilat mund të aksesohen në mënyrë të drejtpërdrejtë nga klienti dhe publiku;

2. Ofron shërbime bazë duke përfshirë regjistrimin, këshillimin dhe ndërmjetësimin;

3. Ofrohet orientim i specializuar dhe këshillim i thelluar, që kërkojnë input të konsiderueshëm nga stafi i zyrës.

Kjo zyrë do të mundësojë:

• regjistrimin dixhital të punëkërkuesve dhe punëdhënësve;

• përmirësimin e efikasitetit të procesit të ndërmjetësimit;

• përshkrimin dhe përditësimin e vendeve të lira të punës;

• ndjekjen efektive të të gjitha aplikimeve;

• aksesin në linjë të shërbimeve për qëllime të regjistrimit dhe të kërkimit të vendeve të lira të punës.

Për të kërkuar punë, të gjithë qytetarët e interesuar mund t’i drejtohen faqes www.puna.gov.al. Aty do të gjejnë mundësi të reja punësimi, ndërkaq aktualisht në këtë faqe janë publikuar 2180 vende të lira pune.