Kryetari i partisë Aleanca për Ardhmërinë e Kosovës, Ramush Haradinaj, tha sot se “janë bërë të gjitha përgatitjet dhe se protesta e nesërme do të jetë e qetë dhe paqësore”.
Në një konferencë të përbashkët për shtyp, me kryetarin e Nisma, Fatmir Limaj, theksuan se “nesër do të jetë protesta më e madhe e parë ndonjëherë”.
Ndërkohë organizatorët e protestës kanë zhvilluar takim me Policinë e Kosovës.
Partia e drejtuar nga Haradinaj në njoftimin e dërguar bën të ditur se, sekretari i përgjithshëm i AAK-së, Blerim Kuçi dhe sekretari egzekutiv, Valon Tolaj, sot kanë pasur një takim me zyrtarë të Policisë së Kosovës, për t’i harmonizuar veprimet për mbarëvajtjen e protestës së nesërme në Prishtinë.
“Duke u nisur nga fakti se protesta është shumë e madhe dhe nesër drejt Prishtinës do të nisen mijëra automjete, Kuçi dhe Tolaj kanë kërkuar mbështetjen e Policisë, që qarkullimi tyre të jetë i papenguar dhe maksimalisht i lehtësuar”, thekson njoftimi.
Policia nga ana e saj, sipas AAK-së, është treguar e gatshme që të ndërmarrë krejt çka është e nevojshme, që protesta të përmbyllët e qetë, çka është edhe përcaktim i organizatorëve të saj.
Në 8 prill bëhej e ditur se, pas konsultave të njëpasnjëshme që nga anulimi i protestës së opozitës së bashkuar që e përbënin tre subjekte, përfshirë Vetëvendosjen, e parashikuar të mbahej me 26 mars, AAK ka marrë vendim për mbajtjen e një proteste gjithpopullore më 14 maj.
“Një vendim i tillë është marrë pas diskutimeve me të gjitha forumet e AAK-së dhe një përcaktimi të palëkundur, që të vazhdohet me kundërshtimin e kapjes së shtetit”, thuhej në njoftim.
Paralajmërohej se, AAK do të konsultohet edhe me partitë e tjera opozitare dhe me shoqërinë civile e me grupet e interesuara.