Ç’QENIE JEMI NE PËR SALI BERISHËN?!

Ka kaluar pa u vënë shumë re një shprehje e Ramës në opozitë, një lloj shprehje me një përmasë postulative, dedikuar rivalit të tij politik, pa qenë pjesë e ligjërimit të zakonshëm e rutinor: Për Saliun nuk ka njerëz, por vetëm votues! E thënë nga Rama, është ndër ato shprehje që i bie pazari, për vetë pozitën e Ramës karshi Berishës, si rivalë të drejtpëdrejtë politikë, por nëse do thuhej dikur, vitë më parë kur Rama nuk ishte aktiv në politikë; ose nëse do të thuhej dhe nga ndokush tjetër, do gëzonte kuotat më të larta të forcës së mesazhit që përcjell, në portetizimin me fare pak fjalë të një politikani si Sali Berisha, krahas asaj të Mero Bazes, sipas së cilit Berisha është një ish-komunist pa asgjë demokratike dhe një demokrat me gjithçka komuniste.

Dje ishte rasti për t`u provuar katërcipërisht se si na sheh ne Sali Berisha, ne, njerëzit e kësaj toke që i thonë Shqipëri, si jemi për të, në ç`sy na vështron, me ç`kut na vlerëson, na gjykon, komunikon apo sillet me ne. pas publikimit të një urdhërese të tij, ku kërkohej garantimi i votës pro PD-së nga ana e administratës e jo vetëm, pasi kërkohej dhe vota e familjarëve të atyre që punojnë në administratë, ai as që e çau fort mender-en, por pacipërisht e pranoi dhe e ngriti zërin më tepër kur këtë gjë ja njohu vetes si meritë, duke vijuar ta vesh dhe me një fill kinse logjik, ku sipas tij, njerëzit e administratës nuk mund të gjykohen vetëm se si qënie politike.

Po pse vallë, a duhet shumë stërmundim për ta kuptuar se çdo frymor në këtë vend, në gjykimin e Berishës, është thjesht një qënie politike, që vlerësohet ose zhvlerësohet si qënie në varësi të votës se ku e hedh. Ne thjesht duhet t`i gezohemi vetëm një fati, që shyqyr që ky njeri na ka rënë për hise në një sistem ku i ka pak duart e lidhura, se imagjinoni sikur ta kishim patur udhëheqës në atë tjetrin që lamë pas. Pra, ka diçka për t`u gëzuar kur është fjala për Berishën në krye të punëve! 

Harito: Emaili ku i bëhej presion administratës për vota. Berisha: Bravo më qoftë

Ministrja e Teknologjisë dhe Inovacionit, Milena Hario, zbuloi sot në Kuvend një e-mail të para 23 qershorit, me anë të të cilit stafi i ish-kryeministrit Berisha i kërkonte administratës të identifikonte votat. “Berisha i kërkonte administratës të identifikonte votat. Pyeste në email”Sa vota të sigurta keni””, tha Harito.

Në replikën e tij, Berisha nuk e mohoi këtë fakt, madje u shpreh krenar. “Në qoftë se e kam shkruar unë, bravo i qoftë Sali Berishës. Po nuk e di a e kam shkruar apo jo. Unë kam zhvilluar konceptin që administrata duhet të shprehë bindjet publike pa asnjë rezervë. Unë nuk i konsideroj punonjësit e administratës si qenie apolitike”, tha ai.