Hetimet mbi UÇK, 120 të dyshuar për 320 serbë të zhdukur

Prokurori amerikan John Clint Williamson ka ngritur një dosje me emrat e rreth 120 udhëheqësve të UÇK-së, të cilët pritet të akuzohen për zhdukjen e rreth 320 serbëve nga rajoni i Rahovecit dhe ai i Dukagjinit.

Dosja do t’u dorëzohet gjyqtarëve të Gjykatës së Speciale për Krime Lufte (e cila nuk është ngritur ende). Kjo gjykatë do të hetojë po ashtu pohimet e senatorit zviceran, Dick Marty. Task forca që udhëheq prokurori Williamson është themeluar me qëllim investigimin lidhur me dyshimet për trafikim me organe njerëzore, por ai së fundi është fokusuar  në zhdukjen e rreth 320 civilëve serbë gjatë viteve të luftës.

Të gjithë të dyshuarit pritet të arrestohen në momentin kur të plotësohet infrastruktura ligjore për krijimin e Gjykatës së Posaçme. “Express” pohon se e ka parë këtë dosje dhe se shumica nga emrat e përmendur aty janë drejtues të njohur të luftës nga rajoni i Dukagjinit dhe nga rajoni i Drenicës. Por, aty ka edhe emra të njerëzve që kanë vepruar kryesisht në pjesën veriore të Shqipërisë, rrëzë kufirit me Kosovën. Vlen të përmendet se në këtë dosje nuk figuron emri i Hashim Thaçit, megjithëse ai është përmendur në raportin e Dick Marty-t, publikuar në 2010-n. Në këtë vit, britanikja “The Guardian” solli një version të shkurtër të raportit të senatorit, në të cilin kryeministri i Kosovës dhe bashkëpunëtorë të tij akuzoheshin, mes tjerash edhe për trafikim organesh të shtetasve serbë. Ky fakt tronditi opinionin shqiptar por edhe atë botëror. Pak media në atë kohë, morën mundimin që ta botonin variantin e plotë të raportit, i cili më pas u aprovua në Këshillin e Evropës dhe me këtë rast solli hetimet e Williamson ndaj Kosovës.

“UÇK-ja qëndron pas trafikimit të organeve njerëzore, në veçanti të civilëve të mbajtur në burgjet sekrete në Shqipëri”, shkruhej ndër të tjera në raport. “Ky lloj aktiviteti kriminal ka vazhduar të veprojë edhe pas luftës në forma të tjera, të ndërlidhura me krimin e organizuar, derisa Misioni Evropian për Sundimin e Ligjit, EULEX-i zbuloi rastin e klinikës “Medicus” në Prishtinë që trafikonte organe”.  Më tej shkruhet se “kjo çështje për herë të parë u përmend në librin autobiografik të ish-kryeprokurores së Hagës, Carla del Ponte, e cila e përmend trafikimin e organeve të njerëzve në kampet e UÇK-së, veçmas në Burrel, në vendin e njohur si Shtëpia e Verdhë”.

Përkundër kritikave ndaj raportit në fjalë, sidomos për shkak të dëmit që i është bërë imazhit të shqiptarëve që nga ajo kohë e deri më sot, duhet parë se në çfarë bazohen hetimet e Prokurorit amerikan Williamson, i cili, pasi Kuvendi i Kosovës të votojë themelimin e Gjykatës Speciale për Krime Lufte, pritet edhe të veprojë konkretisht ndaj të dyshuarve./D.Gjuzi