Hetimet proaktive, priten arrestime të bosëve në energji dhe ndërtim

Rezultatet pas hetimeve proaktive pritet të mundësojnë zbërthimin e rrjeteve të strukturuara kriminale që kanë mundur të pastrojnë para apo të korruptojnë gjyqtarë apo zyrtarë të niveleve të ndryshme. Ndonëse prej vitesh bashkëpunimi polici-prokurori është dukur i vështirë dje u la të kuptohej se krerët e të dyja këtyre institucioneve kishin disa plane konkrete. Saimir Tahiri, si drejtues i dikasterit blu përmendi edhe disa dosje konkrete si “Gërdeci” apo “21 janari”, ndërsa kryeprokurori Adriatik Llalla e la të hapur mundësinë që rezultatet mund të fokusoheshin nga çdo anë. Në deklaratën-bombë të tij thuhej se “Kemi shumë çështje nën hetim, disa prej tyre të një shkallë të tillë që, nëse do të rezultojnë sipas parashikimeve, mund të ndikojnë në të ardhmen e vendit”. Nëse theksi bie mbi të ardhmen e vendit, atëherë merren parasysh kërkesat e vazhdueshme të ekspertëve të BE-së për zhvillimin e hetimeve proaktive dhe luftën e pandërprerë kundër krimit të organizuar.

Pritshmëritë për dosjet e bujshme

Investimet në sektorë të rëndësishëm të energjisë apo të ndërtimit, planifikimet për të investuar si dhe pastrimi i parave, ndërthurur me korruptimin e zyrtarëve janë 3 nga përmbajtjet e të paktën 5 dosjeve të bujshme që gjenden deri më tani në tryezën e ekspertëve të Prokurorisë së Përgjithshme. Burime konfidenciale nga Prokuroria thanë për gazetën “Dita” se bëhet fjalë për shifra që kapin miliona euro, ku përfshihen edhe biznesmenë apo zyrtarë të huaj, ku kanë dalë elementë kriminalë që janë paraqitur si tepër të rëndësishëm në këto lidhje financiare. Vlora, Durrësi dhe Tirana mbeten 3 nga zonat ku priten edhe rezultatet e këtyre hetimeve proaktive që BE-ja ua ka kërkuar me forcë ekspertëve shqiptarë. Në sitën e hetimeve janë funksionarë dhe ish-zyrtarë si dhe biznesmenë apo kriminelë të mirëfilltë. Në këto lloj hetimesh duhet kujtuar se operon një Informator Konfidencial që ka fituar besimin e të piketuarve, por më vonë hyn në skenë edhe agjenti i infiltuar që paraqitet si parner biznesi, kunat, etj i Informatorit Konfidencial që po e ndihmon atë, ose është agjent financiar i tij. Me kalimin e kohës Informatori Konfidencial tërhiqet nga skena. Përveç kësaj metode, në këto hetime prokuroria mësohet të ketë aplikuar edhe “përgjimin e pamiratuar”, bazuar në referencat gjermane hetimore, ku thelbi qëndron në rezultat, pa marrë parasysh procedurën monitoruese apo vëzhguese gjatë hetimit. Në një nga deklaratat e tij komisioneri Shtefan Fyle ka deklaruar se “Në raportin e tij, Komisioni do të marrë gjithashtu parasysh angazhimin e shfaqur nga Shqipëria për të luftuar korrupsionin dhe krimin e organizuar, përfshirë hetimet proaktive dhe ndëshkimet e këtyre rasteve”.

Llalla: Do ndryshojë e ardhmja e vendit

Mes të tjerave në fjalën e tij Kryeprokurori Adriatik Llalla tha se “Takime si ky i sotmi janë shumë të nevojshëm, për të diskutuar mbi luftën e përbashkët kundër kriminalitetit. Prokuroria dhe Policia e Shtetit janë në linjën e parë të përballjes me persona që priren nga veprimet antiligjore. Prokurorët në të gjithë Shqipërinë po dëshmojnë se vetëm falë bashkëpunimit me policinë e shtetit dhe orientimit në veprimtarinë tuaj, mund të kemi sukses në luftën kundër krimit dhe korrupsionit”. Nga fundi i fjalimit kryeprokurori dha deklaratën-bombë. Llalla shtoi se  “Falë bashkëpunimit tonë janë vendosur para përgjegjësisë penale gjyqtarë, prokurorë, zyrtarë të niveleve të ndryshme, grupe kriminale e shumë të tjerë. Ndërkohë, kemi shumë çështje nën hetim, disa prej tyre të një shkallë të tillë që, nëse do të rezultojnë sipas parashikimeve, mund të ndikojnë në të ardhmen e vendit”

Ministri Tahiri

Tahiri konfirmoi gatishmërinë e plotë të Policisë së Shtetit dhe Ministrisë së Punëve të Brendshme për të kontribuar në të gjitha veprimet hetimore të nevojshme, për të hapur dhe për të çuar përpara deri në dënimet penale nga gjykatat, të gjitha çështjet e mbetura pezull por që janë mjaft sensitive për rendin ligjor dhe shtetin e së drejtës. “Veçanërisht ato më të rëndësishmet, për të cilat drejtësia dhe qytetarët presin përgjigje, që ne nuk mund të lejojmë të kthehen në simbol të padrejtësisë, pabarazisë, dhe pandëshkueshmërisë si “Gërdeci”, “21 Janari”, evazioni fiskal me mashtrime në tatime në rendin e miliona eurove, zyrtarët e lartë, ndoshta nivelet më të larta, të kallëzuar për shpërdorim detyre dhe korrupsion, e kështu me radhë. Siç është po për këtë arsye që ne duhet të punojmë bashkarisht në pastrimin e agjencive ligjzbatuese nga të gjithë ata, që mbajnë besimin e publikut por bëjnë shërbimin e paligjshmërisë”-tha Tahiri. Më tej ministri theksoi se Policia e Shtetit kishte proceduar në këto muaj mbi 180 punonjës policie të të gjitha niveleve, por ndihma dhe bashkëpunimi veçanërisht i Prokurorisë, është thelbësor në rritjen e ndëshkueshmërisë ndaj të gjithë atyre punonjësve të Policisë së Shtetit, që abuzojnë me detyrën.