Hidhërimi i De Biazit, një humbje e pamerituar

Xhani De Biazi është shfaqur i hidhëruar në konferencën për shtyp pas ndeshjes. Shqipëria e tij doli duarbosh nga një takim ku meritonte më tepër, si pasojë e rasteve të krijuar në pjesën e dytë. Sllovenët fituan dhe morën tri pikët, për të cilat italiani thotë se nuk i meritoi. “Shpresoja në një rezultat më të mirë. Nëse kishte ndonjë skuadër në fushë që e meritonte fitoren, ajo ishte Shqipëria, pa asnjë diskutim”, tha De Biazi. Trajneri kuqezi vuri në dukje faktin që vendasit shënuan me një goditje në portë. “Praktikisht, Sllovenia e mori fitoren me një gjuajtje të vetme në portën tonë. Kampl dhuroi një kryevepër dhe me këtë i dha fitoren skuadrës së tij. Pastaj, ai që u kujdes për suksesin ishte Samir Handanoviç, me pritjet e tij të shkëlqyera”. Ashtu si kolegu i tij, Sreçko Katanec, edhe De Biazi ka vënë në dukje se jo gjithmonë fiton ai që e meriton. “Ne ishim më mirë se Sllovenia, por ky është futbolli. Nuk fiton gjithmonë skuadra që ka më tepër raste”. Tani Shqipëria luan në Islandë dhe italiani thotë se lufta mbetet e hapur. “Mësova rezultatet e grupit tonë dhe të paktën më vjen mirë që lufta mbetet e hapur dhe ne kemi ende shumë mundësi, edhe pse gjithçka bëhet më e vështirë. Do të luajmë në Islandë të martën, shpresoj që djemtë të jenë mirë fizikisht pas kësaj ndeshjeje të lodhshme. Islanda na ka mundur në Tiranë, ndërkohë që e tregoi edhe me Zvicrën se është skuadër shumë e fortë. Do të shkojmë për një rezultat pozitiv atje dhe shpresoj që të marrim pikët e lëna kundër Sllovenisë””, tha trajneri i Shqipërisë.