Himni i qejflinjve!

I helmuam njerëzit,
veç me politikë,
ndaj sot do t’ju sjellim,
vargje për muzikë!

Populli nga hallet,
i gjithë u pataks,
ndaj dhe ka nevojë,
për pakëz relaks.

Edhe ne nevojé,
kemi porsi Ju,
ndaj një hymn për jetën,
po sjell sot këtu…

Eja në mejhane,
të bëhemi tapë,
jeta është e shkurtër,
vdekja është e gjatë!

Puthim një ezmerkë,
thithim një flokëartë,
qoftë yll kinemaje,
apo dhe kurbatkë!

S’besojmë në Zot,
s’besojmë në fat,
jeta është e shkurtër,
vdekja është e gjatë!

S’pyesim për orë,
ditë-apo natë,
s’pyesim për ditë,
e Hënë-a e Martë!

Rroftë raki e rrushit,
dhe buza me mjaltë,
kur s’ka mish të pjekur,
rroftë Zonja Sallatë!

Jemi të kënaqur,
kur e pijmë dhe thatë,
jeta është e shkurtër,
vdekja është e gjatë!

Ju burra të rreptë,
mos na qani hallin,
me rrëmujën tonë,
jetën tuaj tallim!

Poshtë moralistët,
dhe ju psikopatë,
ju vdisni çdo ditë,
ne lindim çdo natë!.

Mundimet e jetës,
i kemi përqeshur,
ndaj në gji të vdekjes,
shkojmë duke qeshur…

Kush jeton si ne,
jeton sa për shtatë,
rroftë raki e rrushit,
dhe buza me mjaltë!

Jeta është e shkurtër,
vdekja është e gjatë!

01.01.1986. A.DUKA