Hoffman: Trafiku i drogës, problem që nuk lindi në shtator

Ambasadori gjerman në Shqipëri, Helmut Hoffman, ka shigjetuar PD-në në lidhje me akuzat për trafikun e drogës. Duke folur për emisionin “Diplomaticus”, ai ka thënë se trafiku i drogës në Shqipëri ekzistonte para qershorit, ndërkohë që qeveria aktuale ka rritur nivelin e kapjes së lëndëve narkotike.

“Nuk ka filluar në shtator të vitit të kaluar, por ka vazhduar për një kohë të gjatë. Është çështje shqetësuese, sepse ndikohemi në mënyrë direkte të gjithë nga kjo çështje. E vlerësoj që qeveria shprehet se ka rritur nivelin e kapjes së drogës dhe mendoj se do të ishte çështje besimi dhe do ishte interesante që kjo drogë e kapur të shkatërrohet nën vëzhgimin e ndërkombëtarëve. Policia duhet të bëjë punën e saj. Unë nuk jam detektiv, por jam informuar nëpërmjet mediave. Dhe i kam bërë pyetjen vetes, a është ide kaq e mirë që kjo çështje kaq delikate të shtrohet në publik, apo në ambientin politik? Kjo çështje duhet të jetë e depolitizuar. Nëse nuk keni tregues apo indikatorë shumë të fortë, që forcat politike janë të përfshira, do të tregohesha shumë i kujdesshëm për të akuzuar dikë, sepse këto janë akuza shumë të forta. Mund të bësh pyetjen se çfarë po ndodh këtu apo atje, por në përgjithësi duhet lënë policia që të bëjë punën e saj. Nuk duhet shndërruar në një lojë futbolli. Kjo është një tendencë që e kam vënë re që kur kam nisur punën si ambasador i Gjermanisë në Shqipëri, veçanërisht javët e fundit ka një tendencë për të skandalizuar gjithçka, duke e kthyer në çështje politike të brendshme”, tha ambasadori gjerman.