Hoxha: Vllaznia nuk është më “mace e zezë” për Partizanin

Me barazimin përballë Flamurtarit, Partizani humbi një mundësi për të rritur në 6 pikë diferencën nga Skënderbeu ndjekës. Edhe pse të kuqtë i kishin të gjitha shanset ta fitonin sfidën në Vlorë, sipas kapitenit Alban Hoxha, rezultati nuk është i keq. Portieri flet edhe për fitoren e Kukësit me korçarët, por gjithsesi nuk sheh rivalë të tjerë në garën për titull veç kampionëve në fuqi.

“Mund të ishim gjashtë pikë diferencë, por nuk është e thënë që çdo ndeshje duhet fituar patjetër. Nëntë fitore janë një ecuri e mirë, por dhe barazimi nuk ishte i keq. Mund dhe duhej ta fitonim ndeshjen në Vlorë, por nuk mund ta quajmë rezultat të keq. Jemi në vendin e parë dhe në rrugën e duhur. Si pretendentë për titullin përveç Partizanit mbetet edhe Skënderbeu, ndërsa rivalët e tjerë nuk ma mbushin syrin. Nuk do të thotë se një skuadër fiton me Skënderbeun shndërrohet në pretendente”, – thotë Hoxha.

Partizani kërkon të kthehet menjëherë te fitoret prej ndeshjes me Vllazninë. Shkodranët ishin skuadra që gjatë sezonit të kaluar i larguar të kuqtë nga gara për titull, por kapiteni Hoxha beson se situata ka ndryshuar.

“Këtë vit kanë ndryshuar gjërat. Vjet vërtetë ishin mace e zezë për ne, por tani jemi më të përqendruar. Nuk duhet të shfaqim shumë entuziazëm, por lojtarët duhet ta kenë euforinë për të dalë kampionë”, – shton portieri.

Kjo javë kishte një simbolike të veçantë për gardianin, që pas një viti si pjesë e Kombëtares, debutoi me ngjyrat kuqezi në miqësoren me Gjeorgjinë.

“E rëndësishme është që jam pjesë e Kombëtares. Debutimi ishte emocion i veçantë. Ishte një kënaqësi e madhe. Shpresoj të kem edhe më shumë minuta në dispozicion, por kjo varet nga ecuria që do të kem unë, por varet edhe nga trajneri”, – theksoi Hoxha.

Për sfidën e së shtunës me Vllazninë, Partizani pret rikthimin e mbrojtësit Kalari, ndërsa edhe sulmuesi Sebino Plaku është kthyer të stërvitet me grupin. Jashtë ekipit të teknikut Starova do të jenë Ibrahimi dhe Raçiç të skualifikuar me kartonë.