Elseid Hysaj duket i vendosur për të ndjekur trajnerin Maurizio Sarri në Londër. Kjo gjë bëhet e ditur nga burime pranë familjes së mbrojtësit tonë kuqezi.
Babai i tij, Gëzimi, madje, ka qenë në kryeqytetin anglez dhe ka biseduar me drejtuesit e Chelsea për detaje të transferimit.
Synimi është i qartë: familja “Hysaj” dëshiron që të bashkohet në Londër, ku për momentin jeton edhe motra e Elseidit.
Ish-trajneri i Napolit, që do të marrë përsipër drejtimin e skuadrës në “Stamford Bridge”, pas shkarkimit të djeshëm të Antonio Conte, e ka në “paketë” Hysajn dhe dy-tre futbollistë të tjerë, në bisedimet me blutë e Londrës.
Ai dëshiron ta marrë me vete shqiptarin, si pjesë e projektit që ka për drejtimin e skuadrës me pronar sheikun rus, Roman Abramovic.
Palët janë dakorduar për këtë lëvizje dhe kushtet kontraktuale, por tani mbetet si do të procedohet me “divorcin” nga Napoli, sepse klauzola e lirimit të Hysajt është 50 milionë euro.
Mbetet të shihet reagimi presidentit De Laurentis, nëse do të këmbëngulë në këtë shumë, apo duke e parë se dëshira e lojtarit është për të ikur, por edhe trajneri Carlo Ancelotti nuk e konsideron si “mollë e ndaluar” për ta shitur, ndryshe nga paraardhësi i tij, do të bëjë zbritje të çmimit.
a.s/dita