I ftohti i ditëve të fundit ka shtuar ndjeshëm numrin e fëmijëve që janë përballur me komplikacione shëndetësore të shkaktuara nga virozat dhe gjendjet gripale. Vetëm në pediatrinë e QSUT-së, paraqiten çdo ditë për ndihmë 250 pacientë të vegjël. Paraqitja e shumë fëmijëve në gjendje të rënduar është shoqëruar edhe me rritjen e numrit të shtrimeve. Çdo ditë raportohet që 12 fëmijë shtrohen në spital, ndërsa në pavijonin e Pediatrisë Infektive nuk ka më shtretër të lirë. “Numri i paraqitjeve, jo i shtrimeve, ka qenë i madh këto ditë, deri në 250 fëmijë të paraqitur në ambulancë. Një pjesë e fëmijëve janë shtruar në spital për shkak të zgjatjes së temperaturës, për shkak të komplikacioneve që mund të kenë pasur. Për momentin pothuajse nuk kemi shtretër bosh. Njerëzit e kanë lënë pak pas dore vizitën në kohë dhe ndofta ky numër ka rrjedhur dhe për shkak të kësaj situate”, shprehet mjekja infeksioniste në Pediatri, Rajda Petrela. Mjekët këshillojnë që prindërit të tregohen të kujdesshëm dhe t’u krijojnë kushte higjeno-sanitare fëmijëve për ti mbajtur larg mikrobeve. Krahas infeksioneve virale mjekja shton se janë shfaqur edhe raste të dizanterisë, e shkaktuar nga mungesa e kushteve të higjienës apo kequshqyerjes. Ndaj këshillohet që të tregohet kujdes maksimal ndaj këtyre faktorëve. “Pavarësisht që është dimër, ne kemi pasur goxha inderite në këtë periudhë, që lidhen dhe me intoksikacionet akute që mund të kenë pasur fëmijët në këtë periudhë dhe nga një mbiushqyerje e pa vend ose ndonjë pakujdesje e nënave që kanë të bëjnë me mospastërtinë e duarve dhe mënyrën e marrjes së mikrobeve”, shton mjekia Petrela. Mjekia shprehet se vaksina antigrip nuk ka më efekt ndaj nuk këshillohet më aplikimi i saj gjatë kësaj periudhe.