Pas gjashtë vitesh, 176 ndeshjes dhe dy titujve të fituar në Premier League, Samir Nasri, më në fund është larguar nga Manchester City. Ish-ylli i Arsenal ka lënë skuadrën e drejtuar nga Pep Guardiola për tu transferuar në Super Ligën turke, konkretisht te skuadra e Antalyaspor, pikërisht aty ku luan edhe Samuel Eto’o. Futbollisti me pasaportë franceze ka patur të numëruara paraqitjet e tij me City që nga sezoni 2014–15, duke kaluar sezonin e kaluar në huazim te Sevilla, ku luajti në 30 ndeshje dhe shënoi tre gola.
Të shumtë ishin ata që gati gati kishin harruar fare për ekzistencën e Nasri, që u bë protagonist në janar për skandalin e dopingut. Manchester City ka qenë i dëshpëruar në kërkim të shitjes së Nasri, ndonëse nuk e lanë jashtë fazës përgatitore të verës francezin, që u bë pjesë e ekipit të “Qytetarëve” gjatë turneut të Amerikës, madje duke u aktivizuar në ndeshjet ndaj Real Madrid dhe Manchester United.
Të shumta ishin skuadrat të interesuara për shërbimet e ish-futbollistit të përfaqësueses franceze, por si Marseille, Nice apo edhe Roma, nuk ishin të gatshme të paguanin klauzolën e futbollistit, ose pagën vjetore të tij. Nasri bashkohet tani me Antalyaspor, përkrah shumë yjeve të harruar, si ish-mesfushori i Spurs dhe QPR, Sandro, Jeremy Menez, gjithashtu edhe ish-sulmuesi i Barcelona, Inter dhe Chelsea, Eto’o. Nëse ky do të ishte viti 2008, atëherë ky do të ishte një ekip i frikshëm.