Trajtim bukurie apo torturë kineze kjo është mëdyshja për ata që kanë parë foton e bërë në një qendër estetike në Kinë, e që po qarkullon së fundmi në rrjetet perëndimore. Fotoja tregon një grua në fytyrën e së cilës është vendosur krem, ndërsa mbi sy… i digjen dy garza
Që nga kohët e lashta, burra e gra nga të gjitha vendet e botës kanë provuar praktika nga më ekstremet në emër të shëndetit dhe bukurisë. Qendrat termale, sallonet e bukurisë dhe dyqanet e kozmetikëve, në çdo cep të planetit janë munduar të shesin çdo lloj kremi dhe toniku për të çtendosur muskujt dhe për ta bërë lëkurën më të bukur e të shndritshme. Por, asgjë nga këto nuk krahasohet me një “trajtim estetik” që përdoret në Kinë dhe që sipas asaj çka referon faqja e internetit “rocketnews24.com”, përmban një nuancë të spikatur horrori.
Trajtimi me zjarr
Pak ditë më parë në interenet u hodh në qarkullim fotoja e një gruaje, fytyra e së cilës ishte e lyer me krem, ndërsa mbi sy i ishte vënë një peshqir dhe mbi të dy garza që digjeshin. “Mamaja ime po bëhej gati të shkonte në sallonin e zakonshëm të bukurisë dhe unë u ofrova ta shoqëroja. Ajo që pashë atje më shokoi, nuk mund as ta shihja”, tregon autorja e fotos, një vajzë kineze.
Ajo shton se e ëma nuk i kishte treguar kurrë mbi trajtimet që bënte edhe pse praktikën në fjalë dukej se e aplikonte rregullisht. Për një sy të pamësuar, fotoja është e frikshme dhe natyrshëm lind pyetja: si ja bën kjo grua që qëndron kaq e qetë, ndërkohë që sytë “i kanë marrë zjarr” në kuptimin e mirëfilltë të fjalës? Gjithashtu, cilat mund të jenë të mirat që përfitohen nga një trajtim i tillë?
Por, sipas “rocketnews24.com” bëhet fjalë për një praktikë të zakonshme në mjekësinë alternative kineze, që njihet me emrin “Huo liao” (Trajtimi i zjarrit) e që mbështetet në specialitetin e “eliksirit sekret”. Ajo pak që zbulohet nga ky eliksir është se përzihet me një substancë të djegshme që derdhet në një peshqir fytyre, i cili më pas vendoset në zonën e dhimbjeve dhe i vihet flaka, që pas disa sekondash shuhet.
Shërues dhe çlodhës
Mesa duket ky trajtim shërben për të shtendosur dhe çlodhur muskujt e kurrizit, të këmbëve dhe të qafës. Kushdo që i është nënshtruar një procesi të tillë estetiko-fizik (të padëgjuar në Perëndim, por shumë të përhapur në të shkuarën në Lindje) ka deklaruar se është ndjerë në një formë të shkëlqyer. Duke marrë parasysh foton, ky trajtim i shërben gjithashtu edhe fytyrës dhe lëkurës në përgjithësi. Por duhet të jeni mjaft të guximshëm nëse doni ta eksperimentoni mbi lëkurën tuaj.
Përgatiti: Dorina Gjuzi