“I përket një brezi të ri politikanësh që janë të drejtpërdrejtë”, Lubonja: Arsyet pse Rama e bojkotoi Vjosa Osmanin

Analisti Fatos Lubonja foli mbi vizitën në Shqipëri të presidentes në detyrë të Kosovës Vjosa Osmani, duke komentuar deklaratat kundër Mini-Shengenit Ballkanik apo apelit për rezolutën mbi gjenocidin serb.

Lubonja tha se Osmani i përket një brezi të ri politikanësh që janë më të drejtpërdrejtë, ndërsa shtoi se Rama mund ta ketë bojkotuar në Kuvend për të mos i dhënë rëndësi edhe për shkak se ajo është më pranë Vetëvendosjes.

  “Theksimi i disa temave prej saj flet ndoshta për një brez të ri politikanësh, që janë më të drejtpërdrejtë. Qëndrimet e saj më duken më afër Vetëvendosjes. Është pozitive, më mirë kështu, se një vizitë koti, ku flasin për vëllazërinë e madhe dhe nuk flasin për problemet që kemi. Në gjitha ato që tha Osmani, roli i Shqipërisë ka qenë i rëndësishëm, si minishengeni, etj. Osmani e ka vënë dy herë në vështirësi Ramën, kur i kërkoi Parlamentit Shqiptar të miratojë rezolutën për gjenocidin serb në Kosovë. Por, krimet serbe dihen, i ka gjykuar bota, por duhet të shohim krimet tona. Këta tanët duhet të përgjigjen për krimet që kanë bërë ndaj shqiptarëve. Për këtë kërkesë të Osmanit kam rezerva, se duket sikur vënë në dyshim Gjykatën Speciale”, u shpreh Lubonja në News24.

“Kuptohet që Osmani, duke qenë më afër Vetëvendosjes, qëndrimet e kësaj të fundit dihen, dhe duke qenë Rama shumë më afër Thaçit, besoj se ka mbajtur këtë pozicion. Rama e ka treguar veten se është nga ata që mund të selektojë çdo politikan që mund t’i dalë përpara. Mund ta ketë bërë për ta injoruar pak, për të mos i dhënë rëndësi, për ta konsideruar si një presidente kalimtare, për të mos i dhënë peshën që ndoshta ajo kërkon apo meriton”, shtoi ai.

h.b/dita