Furnizim në mininumet historike! Importi, çfarë ndikoi në hapjen e ankandit për blerjen e energjisë? Çfarë e rëndon situatën, si është bilanci i kompanive

Kompania publike e shpërndarjes së energjisë vijon blerjen në tregun e lirë për të siguruar furnizim me energji, e kjo i ka kushtuar shtrenjtë gjatë këtij viti për shkak të situatës së vështirë hidrike.

Të hënën e kësaj jave, Furnizuesi i Tregut të Lirë (FTL) hapi procedurën e radhës për të siguruar energji për datat 8-15 tetor, sipas një shpalljeje që specifikonte se negocimi do të bëhej për të paktën dy lote.

Në lotin e parë, FTL ka kërkuar furnizim me energji për 24 orë për 8 ditë, në fuqi 180 MW, dhe në sasi 34 560 MWh. Ndërsa në lotin e dytë, kompania ka kërkuar furnizim për të paktën 16 orë, po për 8 ditë, ku fuqia është 150 MË dhe sasia 19 200 MWh.

Kjo është hera e parë që FTL del në tregun e lirë për muajin tetor, kurse gjatë shtatorit zhvilloi një sërë procedurash për të siguruar energjinë e nevojshme në vend.

Furnizimi nga KESH për vitin 2020 parashikohet të jetë në minimumet historike, dhe si pasojë, OSHEE përsëri do të mbajë barrën e rëndë të blerjes së kësaj energjie të munguar në treg të lirë me çmime shumë herë më të larta se KESH.

Përveç thatësirës, OSHEE konfirmoi se edhe pandemia ka pasur efektin negativ në dy drejtime.

Së pari, rënia e arkëtimeve nga konsumatorët, të cilët kanë reaguar ndjeshëm si pasojë e vështirësive financiare, si familjare ashtu dhe biznese e buxhetore (rreth 94% gjatë 6-mujorit 2020 nga 98% që ishte në të njëjtën periudhë 2019).

Së dyti, ndryshimi i strukturës së konsumit të energjisë, ku konsumi familjar, i cili e blen me çmim të ulët është rritur, ndërkohë konsumi i biznesit, i cili e blen energjinë me çmim të lartë, është ulur ndjeshëm.

e.sh/Dita