Shoferët e furgonave, viktima të anarkisë

Ministri i Transporteve, Edmond Haxhinasto në një intervistë për gazetën DITA ka sqaruar pozicionin e qeverisë lidhur me taksitë 8+1. Ai shprehet se zbatimi i ligjit mbetet detyra kryesore në vendosjen e rregullave për shërbimin taksi, duke cilësuar se kjo situatë po përdoret politikisht duke krijuar anarki

Zoti Ministër, a ka pasur probleme strategjia e qeverisë me një  fokusim të vëmendjes sidomos dhe në rrafsh mediatik të problematikës së furgonave. Kam parasysh faktin që e gjithë kjo ka nisur pas dy aksidenteve të ndodhuar pak javë më parë, ndërsa sot janë duke u trajtuar detaje të një ligji që është miratuar 6 vite më parë dhe që është një ligj që lidhet më shumë me pasagjerët se sa aksidentet?

Kjo që thoni ju nuk ka lidhje me atë çka po ndodh. Nëse keni parë platformën tonë për zhvillimin e rrugëve aty do të gjeni dhe përgjigjen e kësaj pyetjeje. Kjo që po ndodh ka të bëjë me platformën e transportit publik që ne e kemi anoncuar edhe gjatë fushatës.

Si ka mundësi zoti Ministër që këta njerëz edhe pasi del platforma, edhe pasi sqarohen, vijojnë të jenë sërish në rrugë?

Kjo ndodh sepse janë viktima të anarkisë dhe parregullësisë që ushqehet prej vitesh, manipulohen edhe politikisht. Ata e kuptojnë shumë mirë dhe e dinë që kanë marrë licencë taksie për brenda bashkisë dhe bëjnë një punë tjetër që do një licencë tjetër që është licenca e transportit publik ndërurban.  Kjo vjen nga rrumpallhana e përgjithshme në këtë vend.

Kjo rrumpallëhanë adminstrative është shkak për aksidente?

Sigursiht që është edhe për aksidente. Kanë vdekur me qindra njerëz në Shqipëri nga kjo mënyrë udhëtimi.

Nëse furgoni merr licencën e transportit ndërurban, pse është më i sigurt udhëtimi?

Taksia nuk vepron në rrugë interurbane. Ajo vepron brenda bashkisë. Kur transporti publik del jashtë qytetit, ka standard tjetër. Udhëtohet me autobusë që kanë parametra të tjerë sigurie, janë me nga katër goma mbrapa, kanë dy dyer, kanë parametra më të larta se autoveturat.

Kemi një numër të madh të furgonave në qarkullim, që do të thotë se ka treg për këtë lloj shërbimi…

Nuk ka treg por ka abuzim me tregun. Ai që ka taksi, ai duhet të ketë taksimetër në mjet dhe në momentin që duhet të nisë udhëtimin me pasagjerin duhet ta ndezë atë dhe duhet të marrë pagesë për taksi dhe jo për transport ndërqyettas. Nëse ai e bën këtë, pra ndez taksimetrin, nuk ka për të shkuar njeri te taksia por do të shkojë te autobusi, pasi taksia ka dyfish tarifat e udhëtimit. Por këta çfarë bëjnë, nuk e ndezin taksimetrin dhe marrin 200 lekë më shumë se autobusi. Ndaj citoj dhe një herë se nuk ka më vend për abuzim, këta kanë hyrë si pykë aty, marrin licenca taksie dhe bëjnë transport ndërqytetëas.

Nëse ju i bllokoni furgonat, këta udhëtarë që kanë preferuar deri më sot furgonat për shkak të mbërritjes më shpejt në destinacion, çfarë opsionesh të tjera u mbeten?

Ju mbetet opsioni i autobusëve  që duhet të jenë sipas standardeve të cilësisë dhe sigurisë maksimale.

Ju merrni përsipër se garancitë te autobuzët të jenë maksimale?

Sigurisht që autobusët janë bërë për atë lloj udhëtimi, duke filluar nga ndërtimi, nga cilësia e shofëreve, pateeta që duhet ta kenë të një klasi të caktuar.

***

Tri propozimet e Haxhinastos:

Varianti i parë

Nëse pronarët e taksive 8+1 duan të vazhdojnë të ushtrojnë aktivitetin sipas licencës që kanë, atëherë duhet të vendosin taksimetër ashtu siç e kërkon ligji, të mos ndalojnë vend e pavend që të mbushen me pasagjerë rrugës, të marrin në kthim vetëm ata pasagjerë që kanë transportuar në rrugën e vajtjes, siç e kërkon ligji.

Varianti i dytë

Nëse nuk pranojnë të shërbejnë si taksi, atëherë të aplikojnë për licencë transporti ndër-urban dhe të plotësojnë kushtet teknike që kërkon ligji, të nisen në vende të paracaktuara, me stacione të paracaktuara, sipas orareve të paracaktuara, me mjete me kushte te parashikuara nga ligji

Varianti i tretë

Të ofrojnë shërbimin e transportit brenda qarkut. Kjo rrugëzgjidhje u është paraqitur disa herë shoqatave të taksive dhe sindikatës së tyre.