Ish-të përndjekurit grevistë takojnë Nishanin: I kërkuam ta çojë deri në fund kauzën tonë

Një grup përfaqësuesish të ish-të përndjekurve të grevës së urisë janë pritur nga presidenti i Republikës, Bujar Nishani, i pari dhe i vetmi zyrtar të lartë që ka kontaktuar me ta.

Kreu i grevës, Fatmir Hoxha, shprehu mirënjohjen e tij për Presidentin, i cili sipas tij u hapi derën për problemet e tyre dhe “ do ta mbajë atë hapur 24 orë për ish-të përndjekurit.

“Ne i kërkuam Presidentit që me forcën e ligjit ta çojë gjer në fund kazuzën e kësaj shtrese, që mbart mbi kurriz, burgjet, internimet, pushkatimet dhe sot e kësaj dite që flasim, po përballet me këtë revash çnjerëzor që ka ndërmarrë Edi Rama për pushimin dhe shkarkimin nga puna të fëmijëve të tyre. S’mund të themi dot tani nëse do vazhdojmë apo jo grevën, se kemi njerëz në spital, kemi njerëz që dergjen në atë grevë fisnike dhe do të marrim vendim kur të kthehemi atje”, tha ai.

Hoxha u ndal edhe te mediat, të cilat i akuzoi se po hedhin baltë mbi të përndjekurit.

“Hedhim poshtë me neveri disa gazeta anonime, disa njerëz që kanë lëpirë kockat, disa servilë që deri dje i kanë fshirë xhaketën Sali Berishës dhe sot hedhin baltë mbi këtë shtresë fisnike”, tha ai.

Greva e ish-të përndjekurve ka hyrë në dhjetëditëshin e saj të dytë. PD dhe Shoqata e të Larguarve nga Administrata e kanë mbështetur grevën e ish-të përndjekurve.