Doda: Sulmi ndaj meje, përpjekje e Ramës për të mbajtur të përçarë të djathtën

Deputetja Mesila Doda ka rënë pre e fyerjeve dhe sulmeve nga disa ish të përndjekur gjatë ditës së sotme, ndërsa ata ishin duke protestuar para Kuvendit.

Doda i është bashkuar protestës së tyre, por disa prej ish të përndjekurve kanë kërkuar largimin e saj, pasi sipas tyre, PD është tallur për 23 vjet me këtë shtresë.

Vetë deputetja demokrate ka reaguar më pas, duke thënë se sulmi ndaj saj është një përpjekje ordinere e Edi Ramës për të ndaluar bashkimin e së djathtës.

Doda thotë se personi që e ka fyer atë, është dënuar për përdhunim.

“Më poshtë do të gjeni një kopje të vërtetimit të gjendjes gjyqësore të personit që më sulmoi dhe fyu gjatë vizitës sime dhe të koleges sime Voltana Ademi, në mbështetje të të persekutuarve politikë. Në këtë vërtetim shihet qartë dënimi për arsye ordinere dhe vepra të rënda siç është përdhunimi.

I bëj thirrje të burgosurve politike të distancohen menjëherë nga individe me vepra të tilla të rënda penale dhe të luftojnë për të drejtat e tyre dhe për integrimin e tyre të plotë.

Më së fundi, i deklaroj Edi Ramës dhe kujtdo që mendon se mund të pengojë rrugën tonë të bashkimit të së djathtës dhe të shtresave tradicionale mbështetëse të së djathtës së këto janë përpjekje ordinere dhe të kota. Unë do vazhdoj të mbetem pas cdo vuajtje njerëzore, pas cdo kërkese të shtresave tona tradicionale, duke kërkuar falje për cdo gjë që nuk e plotësuam, pas cdo aspirate që nuk e cuam deri në fund në rrugën tonë. Por pa dyshim, në të gjithë do jemi bashkë për të penguar rikthimin e të kaluarës, të gjithë do jemi bashkë për mbrojtjen e secilit prej tyre”, u shpreh Doda ne Facebook.

Ish-të përndjekurit sulmojnë Dodën: Na ke mashtruar!

Një grup me ish- të përndjekur politikë, të mbledhur përpara Kuvendit për të protestuar, janë vizituar nga deputetja e Partisë Demokratike, Mesila Doda.

Ajo tentoi që t’iu bashkohet protestës së tyre, por ata e sulmuan edhe me fyerje, duke e quajtur ‘plehrë’.

Protestuesit thanë se nuk duan të bien pre e politikës, thjesht duan dëmshpërblimin.

“Na thuaj çfarë ke propozuar kur ishe në parlament? Na ke mashtruar, shoqe,” iu drejtua Dodës njëri prej ish-të përndjekurve.

“U ofendove se të thashë shoqe, ndërsa ajo na ka mashtruar për 23 vjet,” shfryu inatin protestuesi.

Ai ka sulmuar Dodën me fjalë fyese ‘plehrë!’

Kjo ka bërë që Doda të rikthehej në sallën e Kuvendit.

Ish-të përndjekurit nuk lejohen të protestojnë para Kuvendit

Një grup ish-të përndjekurish politikë nuk janë lejuar të zhvillojnë protestën e tyre para godinës së Kuvendit të Shqipërisë.

Pak ditë pas një incidenti të ndodhur ku një prej ish-të përndjekurve ka tentuar të kryejë aktin e vetëdjegies para Parlamentit.

Policia e Shtetit ka marrë masat duke vendosur forca të shumta policie pranë Kuvendit. Ish të përndjekurit kanë paralajmëruar ndërmarrjen e një greve urie 24 orëshe për të sensibilizuar sipas tyre Qeverinë për kërkesat e tyre, që kanë të bëjnë me dëmshpërblimin financiar për vitet e burgut.

Ish- të përndjekurit akuzojnë Qeverinë se i ka mashtruar dhe nuk po mban premtimet.

Ndërkohë Ministria e Mirëqenies Sociale në deklarimet e saj ka bërë të ditur se po dëmshpërblehen ato ish-të përndjekur të cilët ende nuk kanë marrë asnjë këst për vitet e tyre të burgut.

Sipas Qeverisë, në buxhetin e këtij viti është përcaktuar edhe fondi më i madh i 23 viteve përsa i takon dëmshpërblimit financiar të kësaj shtrese të shoqërisë. / TEMA