Lajme jo të mira për kombëtaren italiane të futbollit dhe klubin e Juventusit. Në seancën e fundit stërvitore të përfaqësues së kaltër Claudio Marchisio pësoi një dëmtim të rëndë që do ta mbajë atë jashtë fushave për një periudhë shumë të gjatë.
Vetëm pak orë përpara sfidës kualifikuese ndaj Bullgarisë që do ta zhvillojë në Sofje mbrëmjen e kësaj të shtunë, Italia merr kështu një goditje të rëndë por dëmtimi i Marchisios më shumë sesa planet e përfaqësueses prish ato të Juventusit.
Pas Pol Pogbasë bardhezinjtë humbasin një tjetër element shumë të rëndësishëm të mesfushës së tyre pasi ky sezon është praktikisht i mbyllur për 29-vjeçarin.
Marchisio ka dëmtuar rëndë ligamentet e gjurit të djathtë dhe sipas asaj që raporton “Gazzetta Dello Sport”, futbollistit do t’i duhet të qëndrojë jashtë fushave të blerta nga 6 deri në 8 muaj për tu riaftësuar plotësisht.
Sipas të gjitha gjasave në pozicionin e Marchisios në sfidën ndaj Bullgarisë trajneri i Italisë do të aktivizojë Parolon e Lazios.
Përsa i përket Juventusit, bardhezinjtë duhet të bëjnë pa mesfushorin e tyre për një periudhë shumë të gjatë, por nëse në kampionat fitimi i titullit kampion është një thjeshtë një formalitet për skuadrën e Allegrit, Juventusi do ta vuajë jo pak mungesën e Marchisios në Champions League.
Në këtë sezon 29-vjeçari ka zhvilluar 37 ndeshje me kampionët e Italisë në të gjitha kompeticionet duke realizuar dhe 2 gola.