Ja cilat janë 56 barnat e reja dhe sëmundjet që trajtojnë

Më shumë barna të reja në listën e rimbursimit për 2014. Qeveria ka miratuar gjatë ditës së djeshme listën e re te barnave të rimbursimit, në të cilën janë shtuar 56 medikamente të reja, duke e çuar për herë të parë listën në plot 477 lloje të ndryshme barnash, që u vijnë në ndihmë kategorive në nevojë për të kuruar sëmundje të ndryshme. Në vijim të shkrimit do të gjeni të detajuar secilin nga ilaçet e reja që i është shtuar listës, si dhe llojin e sëmundjes që i vjen në ndihmë. Kreu i Fondit të Sigurimeve Shëndetësore Astrit Beci ka deklaruar se për herë të parë lista është hartuar nga ky institucion. Lista është zgjeruar për të gjitha kategoritë, veçanërisht për fëmijët, gratë shtatzëna, pensionistët, të sëmurët me kancer, të sëmuret kardiakë, etj. “Këtë vit, do të kemi përmirësim të ndjeshëm në trajtimin e disa nozologjive si: Diabeti, anemitë, sëmundjet kardiake, gjithashtu në trajtimin e të sëmurëve me kancer, në neurologji, në nefrologji, në kujdesin paliativ, në dermatologji, gjinekologji, urologji, shëndetin mendor, alergologji dhe okulistikë. Por, risia më e madhe e këtij viti, është trajtimi i disa sëmundjeve të pambuluara më parë nga lista e barnave të rimbursueshme”, vuri në dukje Beci. Konkretisht bëhet fjalë për shtatë lloje të ndryshme diagnozash siç janë disa lloje të ndryshme kanceri. Por, për herë të parë, do të mbulohen nga lista e rimbursimit edhe lloje të tjera kanceri si ai i pulmonit, kanceri rektal, i lëkurës, i heparitm, etj. Fondi i listës së barnave është rreth 8.4 miliard lekë të reja dhe do të mbulohet nga Fondi i Sigurimeve Shëndetësore. Lista e re pritet të hyjë në fuqi më datë 1 prill 2014.

Ministri Ilir Beqaj

Me ndryshimet e bëra kemi arritur që të përfshijnë, disa sëmundje tumorale, përfshirë trajtimin e sëmundjeve të mushkërive, kancerin rektal, të lëkurës, të heparit dhe bëhet fjalë që do të përfitojnë rreth 600 të sëmurë të përvitshëm nga trajtimi me këto barna. po ashtu përfshihet edhe trajtimi i hepatit B e C. Janë përfshirë në listë barna që nuk lejojnë kronicizimin e sëmundjeve. Janë përfshirë barna për parandalimin e trombozave, që përdoren kryesisht pas ndërhyrjeve kirurgjikale dhe sidomos në gratë shtatzëna, në tre muajt e fundit të shtatzënisë. Janë përfshirë barna që përmirësojnë kujdesin për çrregullimet hormonale te fëmijët në pubertet të hershëm. Këtë vit përfshihen për herë të parë edhe barna, të cilat përpiqen të trajtojnë të sëmurë duke ulur edhe plagë sociale, siç janë ato të njerëzve me varësinë nga alkooli.