Ja kartolina e fundvitit, me urimin: “Shqipëria u çlirua!”

Meqë po afron fundviti, angazhimet janë të llojllojta. Tashmë është dhe koha kur shpërthen fantazia e gjithkujt, individë apo grupe interesi, për të gjetur mënyra fitimi, në daç në rrafshin financiar e në daç dhe në atë shpirtëror. Mes shumë detajeve, të atyre që i përkasin dhe linjave të komunikimit ndërqytetar apo institucional, janë dhe kartolinat. Tek to, më shumë se sa teksti, vlen mesazhi vizual nëpërmjet pamjes së zgjedhur. Jemi mësuar me kartolina që kanë përgjithësisht pamje të karamelta, ku fjala vjen, edhe qytetet e lodhura të Shqipërisë, falë kurimeve teknologjike, ndodh të të lëbyrin sytë kur ngjajnë sikur nuk janë tonat, që ne fort mirë e dimë se ç`katastrofë janë në realitet. Por një kartolinë pa asnjë kurim imazhi, e ashpër në vërtetësinë e saj dhe me një mesazh tejet origjinal, do ishte ajo e rradhëve të këtoditshme në sportelet e OSHEE-së, me njerëz që dynden t`i kthejnë paret e mallit që kanë vjedhur, ose që e kanë marrë pa e paguar, me premtimin cinik: “T`i jap kur të çlirohet Shqipëria!”. Kjo pra do ishte kartolina më e gjetur e këtij fundiviti, me urimin: “Shqipëria u çlirua!”. Dërgon: Kryeministria. Merr: Shqiptaria.