Ja përgjegjësitë që do kenë oficerët e sigurisë në shkolla

Siguria në shkollë është një element thelbësor i parandalimit të dukurive negative, si brenda, ashtu edhe jashtë mjediseve të shkollës. Lufta kundër dukurive të tilla, si: episode të dhunës, përdorimi i drogave dhe substancave abuzive, dukuria e bullizmit, siguria fizike në shkolla, etj, do të jenë prioritet i punës që do të kryejnë oficerët e sigurisë që do të vendosen në shkollat e arsimit parauniversitar.

Çfarë janë oficerët e sigurisë në shkollë?

Sipas autoriteteve të Ministrisë së Arsimit dhe Sportit, oficerët e sigurisë në shkollë janë burime të vlefshme të shkollave për krijimin e një mjedisi të sigurt, përmes ndërtimit të marrëdhënieve të forta e të qëndrueshme me nxënësit, stafin e shkollës, prindërit dhe komunitetin. Ata janë të përgatitur dhe të trajnuar për të përmbushur rolet e tyre sa i takon parandalimit të dukurive negative.

Sa i takon zbatimit të ligjit, oficerët e sigurisë në shkolla do të:

• Parandalojnë dhe menaxhojnë rastet e krimit dhe të dhunës në shkollë, duke kontribuar në ndërgjegjësimin e nxënësve për rregullat, autoritetin dhe drejtësinë.
• Punojnë ngushtë me drejtorinë e shkollës dhe me stafin e saj për parandalim dhe ndërhyrje në rastet e thyerjes së disiplinës, për menaxhimin e krizave dhe në rastet e emergjencave, etj.
• Shërbejnë si urë lidhëse ndërmjet policisë dhe të rinjve dhe shkollës.

 Si këshillues për ligjin dhe sigurinë do të:

• Shërbejnë si partnerë dhe këshillues të administratës së shkollës.
• Evidentojnë, raportojnë, dhe në bashkëpunim me psikologun e shkollës do ndërmjetësojnë situatat konfliktuale brenda mjediseve të shkollës.
• Ofrojnë prindërve asistencë për zgjidhjen e situatave të ndryshme dhe për menaxhimin e konflikteve.

Si edukatorë do të:

• Marrin pjesë në takimet me prindër dhe në takime periodike të stafit pedagogjik të shkollës për evidentimin e problematikave dhe diskutimin e zgjidhjeve për sigurinë në shkollë.
• Në mënyrë periodike do të zhvillojnë leksione, ose biseda me nxënësit me qëllim ndërgjegjësimin rreth dukurive dhe kërcënimeve të mundshme, si dhuna, substancat narkotike, trafikimi, siguria fizike
• nga zjarri, etj.
• Shërbejnë si modele rolesh pozitive për nxënësit dhe edukojnë vlerat e sistemit tonë ligjor.

Duhet të dini se oficerët e sigurisë në shkolla:

• Nuk zëvendësojnë rolin e mësuesit në lidhje me përkujdesjen, mbikëqyrjen, sigurimin e disiplinës, rregullit dhe sigurisë në klasë, në shkollë e jashtë saj.
• Nuk ndërmarrin masa disiplinore në shkollë, por raportojnë çdo shkelje të disiplinës së shkollës pranë administratës së shkollës përkatëse.
• Nuk zhvillojnë kontrolle fizike, apo të mjediseve, përveç rasteve të emergjencave dhe vendimit nga administrata e shkollës.

p.k/dita