Facebook raportoi për herë të parë një humbje të përdoruesve të përditshëm pasi aksionet e Meta ranë më shumë se 22% të mërkurën.
Meta fajësoi për parashikimin më të dobët inflacionin dhe ndërprerjet e zinxhirit të furnizimit, të cilat po ndikojnë në buxhetet e reklamuesve. Kompania tha gjithashtu se po përballet me pengesa si rezultat i ndryshimeve të privatësisë së Apple në IOS-in e saj dhe konkurrenca për përdoruesit është rritur nga rivalë si TikTok.
Ndryshimet e fundit të privatësisë nga Apple e bëjnë më të vështirë për kompanitë si Meta të gjurmojnë njerëzit për qëllime reklamimi, gjë që gjithashtu ndikon në të ardhurat e kompanisë. Prej muajsh, Meta ka paralajmëruar investitorët se të ardhurat e saj nuk mund të rriten me ritmin marramendës që janë mësuar.
Për herë të parë në historinë e platformës, Facebook raportoi 2.91 miliardë përdorues aktivë mujorë në tremujorin e katërt, duke mos treguar rritje krahasuar me tremujorin e mëparshëm.
Gjigandi i mediave sociale po investon gjithashtu shumë në projektin e tij futuristik metaverse, por tani për tani, mbështetet thuajse plotësisht në të ardhurat nga reklamat.
CEO i Meta, Mark Zuckerberg e ka përshkruar Metaverse si një “mjedis virtual” në të cilin mund të zhytesh në vend që të shikosh vetëm një ekran. Teorikisht, metaverse është një vend ku njerëzit mund të takohen, të punojnë dhe të luajnë duke përdorur kufje të realitetit virtual, syze të realitetit të shtuar, aplikacione smartphone ose pajisje të tjera.
Zuckerberg po vë bast se metaverse do të jetë gjenerata e ardhshme e internetit, sepse ai mendon se do të jetë një pjesë e madhe e ekonomisë dixhitale. Ai pret që njerëzit të fillojnë ta shohin Metën si një “kompani metaverse” në vitet e ardhshme, në vend të një kompanie të mediave sociale.
a.m/dita