Ja si ndryshon “harta” e Superiores në sezonin e ri

Sezoni i ardhshëm i Kategorisë Superiore do të zgjerojë hartën e pjesëmarrësve, me Tërbunin që për herë të parë hyn mes më të mirëve të futbollit në vend.

Me largimin e Apolonisë dhe Elbasanit dhe ardhjen në elitë të Bylis dhe Tërbunit sezonin e ardhshëm do të kemi një skuadër më shumë nga veriu i Shqipërisë. Rrjedhimisht edhe sfidat derbi për këtë zonë do të shtohen.

Nëse sezonet e kaluara derbi i veriut ishte Vllaznia-Kukësi, apo deri diku konsiderohej i tillë edhe dueli midis Vllaznisë dhe Laçit apo Kukësit e Laçit, duke nisur nga sezoni i ardhshëm, Tërbuni do të shtojë rivalitetin në zonën e veriut.

I ethshëm do të jetë rivaliteti midis Tërbunit dhe Kukësit për vetë distancën e afërt që kanë dy qytetet, që ndahen midis tyre nga 50 km.

Gjithashtu me interes pritet edhe rivaliteti midis Vllaznisë dhe Tërbunit jo vetëm për faktin që distanca ndërmjet dy qyteteve është fare e afërt, por edhe sepse skuadra pukjane mund të konsiderohet si ekipi i dytë i Vllaznisë duke parë shkodranët e shumtë që ka në përbërje.

Ndërkohë, kampionati ka humbur një sfidë me rivalitet dhe histori si ajo ndërmjet Flamurtarit dhe Apolonisë, por gjithsesi vlonjatët do të rigjejnë në rrugën e tyre një rival si Bylis, që rikthehet në Superiore pas një viti në purgator.

Ndërkohë që nga harta e kampionatit për sezonin e ardhshëm, do të largohet impianti më modern për momentin në vend “Elbasan Arena”, duke qenë se vendasit do të luajnë në Kategorinë e Parë.