Trajneri belg ka shprehur dëshirën për ta marrë menjëherë kosovarin, por nuk do ta bezdisë për të vendosur.
Adnan Januzaj ka refuzuar përsëri thirrjen nga Belgjika, çka ka ngjallur shpresat se ai mund të luajë me Shqipërinë. Këtë gjë e ka konfirmuar vetë trajneri i Belgjikës, Mark Vilmots, i cili është shprehur edhe se do ta respektojë vendimin e lojtarit, ndonëse ka siguruar se do të flasë një herë personalisht me të. Pasi në klub ka vajtur ftesa për grumbullimin e lojtarit në dy ndeshjet e fundit eliminatore për botërorin, Manchester United i ka komunikuar federatës belge se Januzaj nuk do t’i përgjigjet thirrjes, për shkak se ai ende nuk e ka vendosur se me cilën kombëtare do të luajë. “E respektoj vendimin e tij, por i dhamë një sinjal të qartë që të luajë me ne dhe tani i takon vetë futbollistit të bëjë zgjedhjen. Unë dua ta përfshij në skuadër dhe ta integroj me grupin pa e sforcuar, e respektoj zgjedhjen e tij. Do të flas vetë me lojtarin dhe përfaqësuesit e tij”, tha Vilmots. 18-vjeçari duket që është në mëdyshje të madhe, pasi nga një anë e thërret Shqipëria, vendi i origjinës, nga ana tjetër është Belgjika, vendi ku është lindur e rritur e që aktualisht përfaqëson një fuqi në rritje në futbollin evropian, falë talenteve të shumtë me moshë të re.