“Je hajdut si gjyshi”. Po ç’ka ndodhur realisht me gjyshin e Blushit?

Botuesi i portalit Pamfleti Gjergj Zefi, akuzoi dje televizionin TCH se i kishte vjedhur një raportim mbi filmimet në një hotel të Tiranës, me të cilin drejtori i TCH ka inate që lidhen me rrjedhje informacioni mbi një takim të tij në ato ambjente.

Zefi i kujton ish-deputetit që “është nipi i gjyshit që vidhte shkrimet e Lef Nosit” – shkruan DITA.

“Ardhja e Blushit në krye të televizonit vetëm po e zhyt në pikiatë një investim gjigand. Lajme-shantazh për interesa personale, braktisje nga emra të njohur në fushën mediatike dhe kopje të shëmtuara të lajmeve ekskluzive, vetëm e vetëm për hir të një egoje të një emri të mëparshëm që sot nuk po shkëlqen më. Vjedhja e lajmit Ekskluziv të Pamfleti për hotel “Plazza”, nuk është ndonjë habi e madhe. Ben Blushi është nipi i gjyshit që vidhte shkrimet e Lef Nosit dhe i botoi si të vetat” – shkruan botuesi i Pamfletit dhe shton se edhe vetë Ben Blushi është akuzuar për plagjiaturë me romane që mbajnë emrin e tij si autor.

Po si është historia dhe pse Blushit ia përmendin gjyshin e tij Dhimitër Shuteriqi. Ku bazohen akuzat se ai i ka vjedhur shkrimet Lef Nosit, pas vdekjes?

Akuzat bazohen në një rrëfim të Mitrush Kutelit:

“Një ditë në Belgrad, Shutja (Dhimitër Shuteriqi) më pat pyetur: – Mitrush, ç’do bënje ti po të kishe gjetur një vepër të pabotuar të një shkrimtari të vdekur? – Ia ktheva: – Do t’i bëja një parathënie dhe do ta botonja. – Ay: – Me emrin e kujt?- Të atij që e ka shkruar. Unë do të kënaqesha t’i jap lexonjësit një vepër që mund të zhdukej. – Jo, – më tha, – vepra e gjetur është imja, se unë e gjeta. Pra, unë, gjetësi, jam “autori” i saj. – Ti s’je autor, se nuk e brumose në mendje e shpirt, nuk vuajte në të lindurat, nuk… nuk. Ay më shikoi tinzar dhe e ktheu fjalën: – Po kur e boton një këngë popullore? – Kur e botoj një këngë popullore, them se ku e kam mbledhur, kush ma ka tregur. Roli im është ta mbledh, ta botoj, t’i tregoj burimin. Ay përsëri: – Po ay që ta dha këtë këngë, s’është autori i saj, pra….- Unë s`them që filani e ka qitur këtë këngë, them se ay ma ka treguar. Po të mund, shtoj ku e ka dëgjuar, kush e këndonte etj. Shutja e ktheu prapë, kategorikisht: – Jo, s`jam dakord. Vepra që kam gjetur është imja. Po të mos isha unë, kushedi, do të humbiste. Pra, unë e gjeta dhe do ta botoj me emrin tim. I thashë: – Kësaj i thonë vjedhje…. – Ay u ngrys. Kështu u mbyll muhabeti ynë në rrugët e Belgradit, në dhjetor 1945”.

n.s. / dita