Tabela rrugore që drejtojnë shoferët drejt Ambasadës së ardhshme të Shteteve të Bashkuara në Jeruzalem janë vendosur të hënën, një javë para hapjes së saj, që koinçidon me përvjetorin e 70 të themelimit të Izraelit.
Presidenti Donald Trump premtoi dhjetorin e kaluar se do ta zhvendoste ambasadën amerikane në Izrael nga Tel Avivi në Jeruzalem, duke përmbysur kështu 7 dekada politikë amerikane.
Kryebashkiaku i Jeruzalemit, Nir Barkat, në një postim në “Twitter” të hënën, shkruante se ai kishte ndihmuar personalisht në vendosjen e tabelave, që janë shkruar në gjuhën angleze, hebraisht dhe arabisht.
“Kjo nuk është një ëndërr, është një realitet”, shkruan ai. “Jeruzalemi është kryeqyteti i përjetshëm i hebrenjve dhe bota po fillon ta pranojë këtë fakt”, tha ai, para se të falenderonte Trumpin për lëvizjen.
Vendimi i dhjetorit të shkuar për të zhvendosur Ambasadën amerikane u kritikua nga shumë udhëheqës botërorë, mes të cilëve Britania e Madhe, Arabia Saudite, Franca, etj.
Komuniteti ndërkombëtar e dënoi gjerësisht vendimin, e madje edhe Shqipëria votoi kundër Trumpit në OKB, por jo të gjitha vendet janë në një mendje. Guatemala ka thënë se do ta zhvendosë Ambasadën e saj në Jeruzalem më 16 maj, dy ditë pas SHBA-ve.
Republika Çeke dhe Rumania po ashtu kanë thyer unitetin europian, duke sinjalizuar se edhe ato synojnë t’i zhvendosin ambasadat e tyre shpejt.
a.s/dita