Jetimorja e Shkodrës, drejtuesit u emëruan me lidhje nepotike

Natasha Bajrami, nëna e 12 fëmijëve, thotë se kërkon të marrë tri vajzat e saj që ndodhen në Jetimoren e Shkodrës. Prej ditës kur në media doli lajmi i prokurorisë se fëmijët e Jetimores janë abuzuar jo vetëm fizikisht por edhe seksualisht, kësaj nënë nuk i thahen lotët. “Dua t’i marr në shtëpi tre vajzat e mia, nuk i lë më asnjë ditë këtu”, shprehet ajo, ndërsa lotët nuk i ndalen. “Më mirë të jetojnë në barake sesa të torturohen atje (Jetimore).

Vajzat e saj 7, 11 dhe 12 vjeçe i kërkojnë nënës së saj që t’i marrë nga shtëpia e fëmijës. “Edhe bukë thatë të hamë vetëm na merr më thonë”, tregon nëna, por drejtori i Jetimores nuk i lejon. Një ditë më parë, Ministri i Mirëqenies Sociale e Rinisë, Blendi Klosi tha se i kishte kërkuar më parë Bashkisë Shkodër që të merrte masa për jetimoren, ndërkohë që ka theksuar se i ka thënë bashkisë se duhet tolerancë zero për të gjithë personat e përfshirë në këtë skandal.

“Ne i kemi kërkuar më parë masa bashkisë së Shkodrës për jetimoren. Kemi kërkuar gjithashtu tolerancë zero për të gjithë personat e përfshirë, në mënyrë që të godasim fenomenin. Ngjarja në fjalë na ka shqetësuar të gjithëve. Dënoj me forcë rastin e rëndë të ngjarjes në Qëndrën Rezidenciale të fëmijëve pranë Bashkisë Shkodër. Nxis hetimin e plotë të asaj që ka ndodhur nga ana e Prokurorisë. Çdo dhunues fëmije, të marrë ndëshkimin e ligjit. Është rasti ti kujtoj çdo bashkie, përgjegjësinë prioritetare për sigurimin e standardeve më të larta për trajtimin e fëmijëve”, tha Ministri.

Bashkia e Shkodrës e ka lënë tërësisht jashtë kontrolli këtë qendër edhe pse administrata e re ka një vit në krye të detyrës.

Burime nga ky qytet bëjnë me dije se emërimet janë bërë në bazë të lidhjeve nepotike dhe klienteliste, ku drejtues të Këshillit Bashkiak të Shkodrës kanë vendosur në krye të Jetimores familjarë të tyre.

Kryebashkiakja në takimin me ministrin u mundua që ta shmangte përgjegjësinë, duke e ndarë atë bashkë me qeverinë qendrore, por administrimi i Jetimores është tërësisht një kompetencë e pushtetit lokal.