Prej ditësh, historia e familjes Buziu është kthyer në telenovelë, duke përfunduar në faqet e para të gazetave dhe të gjitha mediat elektronike. Fatma Buziu, vajza 18-vjeçare që vodhi në shtëpinë e të atit 40 milionë lekë të vjetra dhe 88 mijë franga zvicerane, thotë se e ka kryer e vetme vjedhjen, ndërsa babai i saj akuzon si ideator të dashurin e saj. Sot para trupit gjykues në Gjykatën e Durrësit ka dalë Ismail Xhindi, djali 25-vjeçar me të cilin vajza bashkëjetonte, duke bërë një jetë luksi, në sajë të parave që halla ia dërgonte babait të Fatmës për t’ia ruajtur.
25-vjeçari Xhindi është shprehur para trupit gjykues se nuk kishte asnjë dijeni për vjedhjen. Gjykata e Durrësit ka dhënë masën e sigurisë arrest me burg për djalin, ndërsa prapa hekurave ndodhet edhe Fatma Buziu, e cila u denoncua nga i ati më 5 janar.
Dy të rinjtë bënin një jetë luksoze me paratë e vjedhura në shtëpinë e familjes së vajzës. Ata jetonin në një banesë të mobiluar në mënyrë moderne, ndërsa vajza i kishte dhuruar të dashurit të saj një Benz luksoz, të cilin e kishte blerë me paratë e vjedhura. Pas denoncimit të të atit, policia gjeti në shtëpinë e Fatmës vetëm 6 milionë lekë të vjetra.